Meeqqat sumiginnakkat ikiorsiissutissallu atuinerunermut akiliuteqassasut
Naalakkersuisut Aalisarneq pillugu Ataatsimiititaliarsumut immikkut ittumik en million koruuninik aningaasaliissuteqarniarnerminnut, kontomit meeqqanut sumiginnagaasimasunut, ikiorsiissuteqarnissamut ilisimatuullu suleqatigiittarfissaannut atorneqartussamit aallerniarput.
Aningaasaqarnermut Ataatsimiititaliap naammagisimaanngilluinnarpai, Naalakkersuisut Aalisarneq pillugu Ataatsimiititaliarsuarmut tapiissutit 1 million koruuninik qaffanneqarnissaannik qinnuteqaataannut tunngatillugu akissuteqaatigisimasaat.
Immikkut ittumik en millioninik aningaasaliissuteqarniarneq soqutiginarluinnarpoq, tassami aningaat kontomit, ikiorsiissuteqarnermut, ajunngitsulionermut, ilisimatuut suleqatigiiffissaanut aamma Taliisami Kalaallit Nunaatalu sinnerani meeqqanut sumiginnakkanut atorneqartussanit aaneqarnissaat Naalakkersuisut aalajangiussimammassuk.
Aningaasaqarnermut Ataatsimiititaliap juulip aallaqqaataani piumasaraa, Aalisarneq pillugu Ataatsimiititaliarsuup immikkut en million koruuninik tapiiffigineqarnissaanut pisariaqartitsisimaneq nassuiarneqassasoq. Ataatsimiititaliaq ullut marluk qaangiunneranni akissutisisimavoq, akissutigineqartorli ataatsimiititaliamit naammagineqanngilaq.
Tunngavilersuut
- Suliap ukiup affaanik kinguaattoorsimanera COVID-19 Naalakkersuisut qinnuteqarnerminni tunngavilersuutigaat. Maannakkut aningaasaliissutinut sinaakkutit iluanni suliakkiissummi suliassat naammassineqarnissaannut kinguaattoorneq aningaasartuuteqarnerunissamik sooq kinguneqassanersoq tunngavilersuummi matumani nassuiaatigineqanngilaq. Kingusinaarnerup aningaasaliissutinik atuinissap kinguartinneqarneranik pissusissamisoortumik kinguneqarsinnaanera ataatsimiititaliamit naatsorsuutigineqarpoq, Aningaasaqarnermut Ataatsimiititaliap juulip qulingani ataatsimiissimaneranit imaqarniliami atuarneqarsinnaavoq.
Aningaasaqarnermut Ataatsimiititaliaq taamaammat apeqqutinik nutaanik arlalinnik allattueriarluni Naalakkersuisunut utertitsilluni nassiussisimavoq:
Coronap nalorninartorsiortitsinerata pilersaarutit naatsorsuutigineqareersut suliakkiissummilu suliassat suut allanngortinneqarsimanersut paasissutissiissutigineqarnissaat ataatsimiititaliap kissaatigaa.
Coronap nalorninartorsiortitsilernera sioqqullugu ataatsimiititaliarsuup ataatsimiinnissaat qassit pilersaarusiorneqarsimanersut taakkunanngalu qassit taamaatiinnarneqarsimanersut paasissutissiissutigineqarnissaat ataatsimiititaliap kissaatigaa.
Maniitsumi ataatsimiinnissaq qanga pilersaarusiorneqarsimanersoq aamma ataatsimiinnissap tamatumap sooq kinguartinneqarsimanersoq taamaatinneqarsimanersorluunniit paasissutissiissutigineqarnissaa ataatsimiititaliap kissaatigaa?
Suliami matumani nalinginnaasumik aningaasaliissutissatut naatsorsutigineqartuni ataatsimiititaliarsuarmiit attaveqaqatigiinneq kalaallisut ingerlanneqarnissaa ataatsimiititaliamit isigineqarpoq.
Taamaattumik siunertamut tamatumunnga aningaasaliisoqaqqinnissaa ataatsimiititaliamit pisariaqartinneqanngilaq.
Missingersuusiortarnermut malittarisassat 2008 naapertorlugu ilassutitut aningaasaliissutigineqartut Naalakkersuisut susassaqarfiisa iluini allani sipaarniutitut siunnersuummik malitseqartinneqarsimanngitsoq ataatsimiititaliap maluginiarpaa.
Akiliuteqartariaqartut
Ingerlatsinermi sillimmatinut kontomit millioninik Naalakkersuisut tigusaqarniarput, konto ukioq manna 7,5 millioner koruuninik aningaasaliiffigineqarsimavoq. Oqaasertaliussani atuarneqarsinnaavoq, aningaasat susassaqarfinnut pingasunut atorneqassasut:
Ilaatigut nunat tamalaat nunat tamat ikiuiniaqatigiiffinut imaluunniit pinngortitami ajunaarnersuaqarnermut inuilluunniit ajunaarnerannut atatillugu nunami aningaasanik katersiniarnermut nalnginnaasumilluunniit ajunngitsuliorniarnermut tapiissutissatut atorneqartussaagaluarput.
750.000 koruunit angullugit nunani tamalaani ilisimatuut Kalaallit Nunaanni suleqatigiffissaattut atorneqartussaagaluarput.
Kontomi aningaasaatigisat, suliniutit tigussaasut atuutsinneqalernissaat atorneqarsinnaapput, soorlu Tasiilami Kalaallillu Nunaata sinnerani meeqqat sumiginnagaasimsut atlugarliortullu ikiorserneqarnissaannut.
