Milliuunilikkuutaanik suli akiliisariaqartut: Ikuallaaviit akisunerulerput

Ikuallaaviit sanaartorneqarneri naatsorsuutigineqartumit akisunerulersimapput taarsigassarsianullu erniat ikuallaavinnillu sivisuumik aningaasalersuinissaq qaffannikuulluni.

Sanaartornermut aningaasartuutit aamma kredittinut erniat annertunerulerput, sanaartukkanullu aningaasaliissutissat annertunerusariaqalerput. Kommunit eqqagassalerinermi piginneqatigiiffiat ESANI A/S aningaasaliiffigineqaqqittariaqalerpoq.

Kommunit sisamat, Kommune Qeqertalik, Qeqqata Kommunia, Kommuneqarfik Sermersooq aamma Kommune Kujalleq ikuallaaviliornernut aningaasaliinerunissamut periarfissat piffissami matumani aalajangiiffigissavaat.

ESANI suliniutinut aningaasaleeqqinnissamut periarfissanik misissuilereersoq, Qeqqata Kommuniani kommunalbestyrelsep ataatsimiinnissaani oqaluuserisassani allassimavoq.

Aningaasat suli pisariaqartinneqarput

ESANI A/S-ip naatsorsorsimavaa ikuallaaviit naammassinissaanut aningaasat 50 mio. kr.-t tungaannut aningaasaliissutigineqareersut qaavatigut suli pisariaqartinneqartut. Kommunit sisamat piginneqatigiit tamarmik suliffeqarfimmut 500.000 koruuninik aningaasaliisimapput, saniatigullu tamarmik immikkut ansvarlig lånekapital-itut taaneqartartumik 10 mio. koruuninik aningaasanik attartortitsillutik. Tamatuma saniatigut piginneqataasut tamarmik immikkut Avatangiisinut Aningaasaateqarfimmit 12,5 mio. koruuninik tapiiffigineqarsimapput, suliffeqarfimmut aningaasaliissutigisimasaminnik.

Kommunit ESANI-llu sulissutigaa aningaasat pisariaqartinneqartut kredittinngorlugit attartorneqassasut, taamaasillutik kommunit karsiiniit aningaasaliisoqassanani. Taamaasiortoqassappalli Namminersorlutik Oqartussanit immikkut ittumik akuerineqarnissaq pisariaqartinneqarpoq:

- Aningaasaateqarnissamik pisariaqartitsineq taarsigassarsinikkut pissappat, taava ukiuni arlalinni suliffeqarfiup akiliisinnaassuseqarnera 25 procentit ataateqqasimasussaassavaa. Akiliisinnaassuseq 2024-mi 18 procentit missaani apparsimassaaq, ukiunilu tulliuttuni qaffakkiartussalluni 2031-mi 25 procentit qulaaniileqqissimassalluni, nassuiarneqarpoq.

Naalakkersuisoqarfik immikkut akuersissuteqarusuttoq

Kommunalbestyrelsip akuerseqataaffiginikuuaa suliffeqarfik ikuallaavinnik marluusunik qularnaveeqqusiussisimanera.

Ikuallaavinnik taakkunannga marlunnik qularnaveeqqusiussineq pillugu kommunalbestyrelsip akuersinera kommunip naatsorsuutaani kukkunersiuisunit oqaasertalersorneqannginnissaa qulakkeerumallugu, nammineerluni aningaasaliissutaa annertusisissallugu pisariaqarpoq, piginnittut suliffeqarfimmut aningaasaliissuteqaqqinnerisigut, imaluunniit immikkut ittumik qinnuteqarluni akiliisinnaassuseqarnissap 25%-imiittussaaneranut piumasaqaatip sanioqqunneqarsinnaaneranut.

ESANI-p kommunit piumaffigai pisinnaatinneqarumalluni akiliisinnaassuseqarnerup ukiuni tullerni annikinnerusariaqarneranik immikkut ittumik akuersissummik qinnuteqarnissamut, aningaasaliinerit pisariaqartut inissinneqarsinnaaniassammata.

- Aningaasaqarnermut Akileraartarnermullu Naalakkersuisoqarfiup nalunaarutigivaa, kommunip immikkut ittumik akuereqqulluni qinnuteqaataa akuersaartumik nalilersorumaarlugu.

Nuummi ikuallaavik aappaagu atulertussatut naatsorsuutigineqarpoq, Sisimiunilu ikuallaavik 2025-mi piareertussatut naatsorsuutigineqarluni.