Misileraalluni makrelinik aalisarneq iluarisimaarpaat

Royal Greenlandip iluarisimaarinnilluni kulluni qummut saatippaa tunumi misileraalluni makrelinik septemberip qeqqani aalisartoqareersoq.

Royalgreenland.gl taama allaaserisaqarpoq.

Makrelit Islandimut tulaanneqarput ilaalu aalisarfimmi umiarsuarnut qerititsivilinnut ikineqarlutik.

Kiinamiut angallataat attartukkani aalisartinneragut Royal Greenland misileraanermut peqataavoq. Aammattaaq Islandimiut angallataatai Royal Greenlandip annerusumik minnerusumilluunniit piginneqataaffiisa umiarsuaatillit misileraalluni aalisarsinnaanissamut akuersissutaat atorlugit aalisarput. Islandimiut angallataataasa aalisarnerat Islandimi pisortanit unitsinneqarpoq 2013-imi juulip naggataata missaani.

Kalaallit kilisaataat Tuugaalik aamma Timmiarmiut tamarmik Royal Greenlandimut attuumassutiliusut aammattaaq misileraallutik aalisaqataapput.

- Royal Greenland neriuppoq siunissami nammineq pigisaminik kilisaatinik aalisariarsinnaassalluni. Attartukkat namminerlu kilisaataatit atorneqassasut ilimanarpoq, sulili Kalaallit Nunaanni pisortanit aappaagussamut pisassiissutit agguataarneqarnissaat aammalu qanoq periarfissiisoqarumaarnersoq utaqqivarput, oqarpoq Jens Bisgaard, Royal Greenlandip kilisaataataani ingerlatsinermi tunisassiornermilu ingerlatsisoq. Jens Bisgaardip akisussaaffigaa Royal Greenlandip nammineq pigisatut kilisaataataanik allanillu kilisaatinik ingerlatsineq.

Tunumi makrelinik misileraalluni aalisarnermut pisassiissutit katillugit 65.000 tonsiusunit aalisarneqartut 52.000 tonsit missaanniipput – taakkunannga 10.000 tonsit missaat Royal Greenlandip kilisaataataanik aalisarneqarlutik. Sinneri Polar Seafoodip allallu Kalaallit Nunaannut tunngassuteqartut umiarsuaatillit aalisarpaat.

Makrelinik pisisartut pingaarnerit tassaapput Afrikap Kitaa, Rusland aammalu nunat siusinnerusukkut Europap Kangisissuaaneersimasut.