Misissuineq: Qilalukkat nipiliorfimmiillutik neriumajunnaartarput
Umiarsuit inuillu imaani misissuinerisa kingunerisaanik nipiliortoqartillugu, qilalukkat nerisassarsiorunnaartarput. Ilisimatuut misissuinerisa tamanna takutippaat, aaqqiissutaasinnaasumillu aamma siunnersuuteqarput.
Qilalukkat avatangiisaanni nipiliortoqarpat qilalukkat pissusaat qanoq allannguuteqartarnersoq ilisimatuut misissorsimavaat. Misissuinerup inernerisa takutippaat qilalukkat neriniarunnaartartut avatangiisaat inunnit nipiliorfiuallaaleraangat, soorlu umiarsuit imaaniluunniit oliamik aamma gas-imik misissuisoqartillugu.
Qilalukkat imaani 2 kilometerisut ititingisumi piniartarput.
- Allannguut malunnarnerpaaq tassaavoq qilalukkat itinerusumut aqqartarunnaartarnerat, neriniarunnaartarnerallu, videnskab.dk-mi ilisimatuut paasisaminnik saqqummiussiffigisartagaanni allassimavoq.
- Umiarsuit qaninnerpaaffianni qilalukkat neriunnaavittarput. Umiarsuit qaninnerpaaffianni qilalukkat aamma puiniarunnaartarput, uummataasalu tillernerat nikerartorujussuanngortarluni, allassimavoq.
Qilalukkat arfineq-pingasut misissuinermi peqataatinneqartut
Ilisimatuut nunatsinni piniartut suleqatigalugit qilalukkat arfineq-pingasut nalunaarsuummik ikkussiffigisimavaat, imaani qanoq pissusilersornerat uummataasalu tillernerat malinnaaffiginiarlugu.
Atortut ikkutereernerini qilalukkat ipararneqarsimapput, ilisimatuullu umiarsuaataa qilalukkat ilaat malissimavaat. Misileraanerni nipiliuutinik assigiinngitsunik misiliisoqarpoq.
Ilisimatuut aaqqiissuteqarnissamut ersarissumik oqariartuuteqarput.
- Periarfissat marluusut takusinnaavakka. Aappaa tassa umiarsuit Issittumi angalasut nipiliortarnerisa killilersimaartinnissaat. Taamaaliortoqarsinnaavoq umiarsuup kigaannerusumik ingerlaneratigut, imaluunniit nipiliunnginnerusunik sanallugulu sarpilerlugu.
- Aappaattut umiarsuit angalaffissaat aalajangersimasuutinnissaat, qilalukkat sumiiffigisartagaat qimallugit. Qilalukkat annaanniaraanni aqqutissat taakku marluutillugit atorneqartariaqarpasipput, Pinngortitaleriffimmi ilisimatusarluni sulisoq Outi Tervo, misissuinermi aqutsisuusoq oqarpoq.