Misissuineq: Suliffiit 1000-init amerlanerusut takornarianut attuumassuteqarput
Nunanit allanit takornariat 1.000-it sinnerlugit suliffissaqartitsisuusut, Kalaallit Nunaannullu 1,9 milliardit koruuningajannik kaaviiaartitsisuusut, takornariartitsinerup pingaaruteqassusianik misissuinerup nutaap takutippaa.
Annonse
Takornariat nunanit allaneersut Kalaallit Nunaannut qanoq iluaqutaatigippat?
Suliffeqarfinnit arfineq-pingasunit – ilaatigut Grønlandsbankenimit aamma Kalaallit Airportsimit – apeqqut tamanna misissorneqarpoq, sapaatip-akunneranilu matumani misissuinerup inernera tamanut saqqummiunneqarpoq.
- Siunissami pingaarnersiuinermi pitsaasumik aaliangiisoqartinnagu aningaasaliisarneq aammalu pilersaarusiortarneq pillugu paasisimasaqarluarnissaq pisariaqarluinnartuusoq, suleqatigiit nalilerpaat, tusagassiuutinut nalunaarummi allassimavoq.
Amerliartortut
Takornarianut apeqqutit immersugassartallit, umiarsuarnik takornariartaatinik ingerlatsisut akornanni paasissutissanik katersineq aamma Naatsorsueqqissaartarfiup kisitsisaatai tunngavigalugit Rambøll misissuisimavoq.
Nunanit allanit takornariat 2018-imiilli 46 procentimik amerleriarsimasut inerniliunneqarpoq.
Umiarsuarnik takornariartaatinik takornariartitsisarneq amerliartornermut pissutaanerpaavoq, soorlu takussutissami ataaniittumi takuneqarsinnaasoq:
Timmisartumik takornariartut ikinnerpaagaluartut, kaaviiaartitanut 57 procentinik tunniussisuupput, 2023-milu 1,9 milliardit koruuniunissaat missingerneqarsimavoq.
Kalaallit Nunaannimi umiarsuarmik takornariartaatinik takornariartunit timmisartorlutik takornariat atuinerupput.
Agguaqatigiissillugu 57.500 koruuninik atuisartut
Ilaqutariit pingasuusut timmisartumik Kalaallit Nunaannut tikissimasut agguaqatigiissillugu 57.500 koruuninik atuisartut Rambøll naliliivoq, tamannalu Kalaallit Nunaannut tuttarpoq.
Umiarsuarnik takornariartaatinik takornariat 27.150 koruuninik aningaasartuuteqartarput, umiarsuarnili takornariartaatini ilisimasassarsiorluni takornariartut 38.350 koruuninik aningaasartuuteqartarlutik.
Nunanit allanit takornariat 1.075-inik suliffissaqartitsisut Rambøllip aamma naatsorsorsimavaa, 48 millionit koruuninik akileraarutinik 87 millionit koruuninillu akitsuutinik akiliisimallutik.
Pisortaq: Piviusut tunngavigalugit oqallinneq pingaaruteqarpoq
Nunanit allanit takornariat tikittartut inuiaqatigiinnut aningaasatigut pingaaruteqartumik isertitsissutaalluartarnerat sunniutaalu pillugit paasisimasaqarneq, siunissami aaliangiisarnissamut aningaasaliisarnissamullu pingaaruteqarluinnartuusoq, Visit Greenlandimi pisortaq Anne Nivíka Grødem, saqqummiussinermut atatillugu oqarpoq:
- Kalaallit Nunaannut aningaasatigut takornariaqarnerup qanoq iluaqutaatiginera tamatta ataatsimut paasisimassagipput ilanngullugu pingaaruteqarluinnartuuvoq, taamaasilluta takornariaqarnerup qanoq pingaaruteqartigisumik inissisimanissaa, takornariaqarnerullu siunissami qanoq pingaartinneqartiginissaanut paaseqatigiissuteqarsinnaaqqulluta.
- Ilisimalersimasat tunngavigalugit takornariaqarnerup oqallisiginissaa, aammalu ataqqillugu takornariaqarneq tassaasoq inuiaqatigiinnut aningaasatigut annertuumik pingaaruteqartumik inissisimanerata ataqqinissaa paasisisimasat saqqummiunneratigut tamatta kissaatigaarput, Visit Greenlandip pisortaa Anne Nivíka Grødem oqarpoq.
