Nuummi mittarfik nutaaq:
Mittarfissaq nutaaq pillugu kisitsiserpassuit
Sanaartornermi aningaasartuutit Ingeniørinit kisinneqarput.
Sanaartorneq pisortatigoortumik aallartippoq 2019-imi oktobarip 16-ianni, taamanikkut Naalakkersuisut siulittaasuata Kim Kielsenip Inooraq Heinrich Larsen arfineq-pingasunik ukiulik sanaartornersuarmi qaartiterinerit arlallit siullersaannik qaartitseqatigaa.
Assiliisoq: Leiff Josefsen
Nuummi mittarfiliorneq ukiuni tallimani kingullerni
ingerlanneqartoq ingeniørit suliaraat annertungaatsiartoq – arlaleriarluni annertuumik
qaartitsisoqartarpoq nunatsinnilu illoqarfiit pingaarnersaanni sanaartortut
piffissami sivikinnerusumi sivisunerusumiluunniit najugaqartarsimapput.
Sulineq pisortatigoortumik oktobarip 16-ani 2019-imi
aallartippoq. Pilersaarutaasimagaluarpoq mittarfik nutaaq siorna
naammassineqassasoq, coronalli nunarsuarmi tuniluunnerata kingorna ammaanissaq
2024-mut kinguartinneqarpoq.
Maannalu mittarfik naammassilluinnalerpoq. Sanaartorneq
annertungaatsiartoq siunissami illoqarfiit pingaarnersaanniit illoqarfinnut
allanut angallannermik ajornannginnerulersitsisussaq
akikinnerulersitsissagunartorlu.
Kalaallit Nunaanni sanaartornerit annertunersaat
Suliaqarneq tamakkerluni 2 milliardit koruunit missaannik
naleqarpoq. 1993-imi Utoqqarmiut Kangerluarsunnguanni Kangerluarsunnguup
Ikerasaani sanaartorneq, maannamut sanaartornerit annersaat, 1 milliardit
koruunit missaannik akeqarsimavoq.
Sanaartornermut atatillugu qaqqaq katillugut 6,8 milliuunit
kubikmeteri qaartinneqarsimavoq. Qaartitsinermi annerpaami katillugit 93.000
kubikmeteri qaartinneqarsimavoq. Qaartitsinermi tassani ataatsimi
assersuutigineqarsinnaavoq naluttarfik 10 miiterisut itissusilik 30,5
meterinillu takitingisup angeqqataa qaartinneqarsimasoq.
Nuummi mittarfik nutaaq 2 milliardit koruuninik naleqarpoq.
Foto: Leiff Josefsen
Qaartartuutit qanoq amerlatigisut qanorlu ittunik
sananeqarsimanersut ilisimatitsissutigineqarsinnaasimanngilaq, Greenland
Airportsimili attaveqaqatigiinnermut immikkoortortaqarfimmit missingiunneqarpoq
qaartartuutit tonsit tusindillit missaanniittut atorneqarsimassasut.
Sorsunnersuup aappaani qaartartorsuit anginerit atorneqartut sanilliukkaanni,
qaartartorsuaq ataaseq fem tonsitut oqimaatsigaaq.
Asfaltilersuinermi maskiinat aamma atorneqarput.
Nunaminertaq 315.000 kvadratmeterisut annertutigisoq asfaltilersorneqarsimavoq,
Tassa arsaattarfiit 44-t sanileriisikkaanni angeqqataat.
Sanaartornerup annertunerpaaffiani maskiinat 70-it
ataatsikkut atorneqarput. Ukiullu ingerlaneranni sulisut 250-it
sanaartoqataasimapput. Sanaartortut nunanit 40-nit
assigiinngitsuneersuusimapput.
Nuummi mittarfik nutaaq 2.200 meterisut takissuseqarpoq,
timmisartoqarfittaarlu angalasunik 600-nik akunnermut sullissisinnaavoq.
