Motzfeldt: Ikkarlittoqarnerata ersersippaa inatsisitigut sukaterinissaq pisariaqartoq
Naalakkersuisoq Vivian Motzfeldt (S) takornariaqarnermut tunngasunut akisussaasuuvoq, taanna Sermitsiaq.AG-mut oqaluttuarpoq umiarsuit takornariartaatit nunatsinni angalasarnerat pillugu kommunit ataasiakkaarlugit oqaloqatigineqartut, taakku peqatigalugit paaseqatigalugillu sukaterineq ingerlanneqassammat.
Nunanut allanut, inuussutissarsiornermut niuernermullu Naalakkersuisoq, Vivian Motzfeldt (S), Alpefjordemi umiarsuaq takornariartaat Ocean Explorer ikkarlinnermi kingorna suli kaanngarsinnaasimanngitsoq pillugu oqaaseqarsinnaanngilaq.
Tassungami tunngatillugu nunalerinermut, imminut Pilersornermut, nukissiutinut avatangiisinullu Naalakkersuisoq, Kalistat Lund (IA) naalakkersuisut sinnerlugit pisumut alaatsinaappoq.
Taamaakkaluartorli Vivian Motzfeldt matumani pisoq aallaavigalugu ajornartorsutinngorsinnaasut ataatsimut isigalugit nalilersuilluni suliaqarlunilu aallartereerpoq, takornariaqarnermi suliassaqarfigalugulu akisussaaffigigamiuk. Pisullu ersersippaa inatsisit malittarisassallu tamarmik nalilersoqqinneqartariaqartut:
- Soorunami naammagisimaarnarpoq ilaasut, inuttat umuarsiarlu peqqissutsikkut avatangiisinullu tunngatillugu manna tikillugu ajornartuuittutut nalilerneqanngimmat Vivian Motzfeldt oqarpoq nangillunilu:
Piumasaqaatit ersarissut aappaagumit atuutilissasut kissaataavoq
- Taamaattorli tassa ukioq manna umiarsuit takornariartaatsit pilersaarutitik malillugit nunatsinnukarrattarput. Takornariartaassuit tamakku nunatta sineriaani aammalu kangerlunni angalasartut tamarmik akuersissummik qinnuteqaateqarnikuullutillu pissarsinikuupput. Pisorli maanna nalaanneqartoq immini ersersitsivoq, aappagumiit inatsisitigut malittarisassatigullu sukatikkanik, ersarissunik avaqqutaarneqarsinnaanngitsunillu malittarisassaqartittariaqarigut.
Kalaallit Nunarput sineriaqarpoq 44.000 kilometerit missaanik annertussusilimmik. Tassaniipput kangerluppassuit, umiarsuit takornariartaatsit tikissinnaasaat. Sinerissap ilarujussua kommunit agguarneqarnerisa iluiniippoq, taamaammallu Vivian Motzfeldtip pingaartippaa siunissami malittarisassiornissamut kommunit peqataallutillu tusaaneqarnissaat:
- Kangerluit ilarpassui piniariartarfiullutillu aalisarfiupput, tamatumalu saniatigut nunaminertat ilai eqqissisimatitaapput, tamakkulu soorunami paarilluarneqassasut kissaatigaarput. Tassunga tunngatillugu kommunit ataasiakkaarlugit maanna oqaloqatigaakka tusarusullugu kommunit tungaannit kissaatit piumasaqaatillu qanoq ittut umiarsuit takornariartaatsit pillugit inatsisitigut sukaterinissami eqqumaffigineqassanersut, taanna oqarpoq nangillunilu:
Eqqissisimatitat oqaluuserineqartariaqarput
- Kommunit nalunngilaat kangerluit piniariartarfiit aalisarfiillu immikkut paarilluagassat nalinginnaannarlu angallaffiusariaqanngitsut sumiippiarnersut, Naalakkersuisunullu pingaaruteqarpoq sulinerup ingerlanerani kommunit tusaassallugit, naatsorsuutigaaralu aappagu inatsisit malitassallu umiarsuit takornariartaatit nunatta imartaani aammalu kangerlummukartariaqaavikkunik kangerlunni sorlernukarsinnaassanersut inatsisitigut malittarisassatigullu piareersitsisinnaassalluta.
Vivian Motzfeldt matumani aamma erseqqissaavoq inatsisitigut malittarisassat qulaajarneqarlutillu sukatersinnaaffiisigut sukaterneqartariaqartut. Assersuutigaa qeqertaq Uunartoq Kujataaniittoq, taanna eqqissisimatitaavoq.
- Eqqissisimatitaanerali nunap qaaniinnaq taamaallaat atuuppoq, taamaammat aamma umiarsuit takornariartaatsit qanorluunniit angitigisut Uunartup eqqannguani angalaarsinnaapput, ullumikkummi inatsisit malittarisassallu naapertorlugit imartatsinni angalaarsinnaanermut akuersissummik pissarsisimaneq naammammat.
- Suli Naalakkersuisuni isummerfissaqaraluarluta, uanga nammineq isertuutissanngilara, sumiiffiit eqqissisimatitat imartaat aamma ilanngullugit eqqissisimatinneqartariaqartut isumaqarama, taamaammat taanna aamma qaqilissallutigu pissusissamisoorpoq, nunanut allanut, inuussutissarsiornermut niuernermullu Naalakkersuisoq, Vivian Motzfeldt Sermitsiaq.AG-mut oqarpoq.