MT Højgaard Kalaallit Nunaanni amigartooruteqangaatsiartuarsinnarpoq

Danmarkimi sanaartornermik suliaqartut annersaasa ilaasa MT Højgaard Holdingip Danmarkimi aallussai pingaarnerit kisimik aningaasarsiorfiullutillu nammatsisuupput.

Suliffeqarfik 2019-imiilli aaqqissuusseqqinnermik iluarsaanermillu annertuumik ingerlatsivoq, tassani immikkoortortaqarfiit arfineq-marluk maanna marlunnut, MT Højgaard Danmarkimut aamma Enemærke & Petersenimut, ikilisinneqarput.

Ilaatigut nunani tamalaani niuerneq, ingammik piginneqataaffittut Kalaallit Nunaanni ingerlatsiviit marluk MT Højgaard Grønland aamma Arssarnerit, sanaartornermik ingerlatsivissuarmut ajoqutaasumik annaasaqartarput. Kalaallit Nunaanni aallussat maanna unitsinneqangajalerput.

MT Højgaard Holdingip nunani tamalaani ingerlatsiviisa matuneqarnissaannik 2023-mi aalajangernerup kingorna, ingerlatsiviit matuneqarsimasut 2023-mi 201 million koruuninik annaasaqarsimasut 2024-mi 168 million koruuninik annaasaqarsimapput. Aningaasat annaaneqartut amerlanerpaartaat Arssarnerit-mit aamma MT Højgaard Grønland-imeersuupput, suliffeqarfissuaq ilisimatitsivoq.

- Teknikkimut tunngasunik suliffeqarfik Arssarnerit pigisallu annikinnerit kisimik tunineqarmata 2025-mi annaasat annikinnerungaatsiassapput, MT Højgaard Holdingimi pisortaaneq Rasmus Untidt Sermitsiamut oqarpoq.

Arssarnerit aamma MT Højgaard Grønlandip 2024-mut naatsorsuutaat suliffeqarfiit nalunaarsorsimaffianni CVR-imi tamanut saqqummiunneqaqqammerput.

Utoqqarmiut Kangerluarsunnguani sanaartugassanik milliardilinnik pissarsiniarsarisut

Spaniamiut qallunaallu suliffeqarfiutaat JV Cobra - MT Højgaard Nuup eqqaani Utoqqarmiut Kangerluarsunnguanni erngup nukinganik nukissiorfiup allilerneqarnissaanut isumaqatigiissummut milliardilikkaanut neqeroornissamut periarfissinneqaqqammermat tamanna pivoq.

Sermitsiap qanittukkut allaaserisaatut Spaniamiut qallunaallu suliffeqarfiutaat suliffeqarfiit pingasut isumaqatigiissummut neqerooruteqartussat ilagaat. JV Cobra- MT Højgaardip saniatigut neqerooruteqartussat tassaapput Canadamit Pennecon Aecon aamma tyskinit portugiinillu Thyssen Schachtbau GmbH aamma Alberto Couto Alves.

Sanaartorneq 3 milliarder koruunit missaannik akeqassangatinneqartoq sullorsuarmik 16 kilometerisut takitigisumik, nukissiorfimmik nutaamik pingasunik nukiliorfiutilimmik aamma erngup nukinganik nukissiorfimmik nutaamik innaallagissiorfimmut pioreersumut 36 kilometerisut takitigisumut aqquteqalersitsisussaq sanaartornissamut tunngavoq.

- Suliffeqarfissuup JV Cobra – MT Højgaard, Utoqqarmiut Kangerluarsunnguanni nukissiorfiup allilerneqarnissaanut neqerooruteqarsinnaasoq, suleqatigigaa ilumoorpoq. Tamannali suliffeqarfissuup siunissami Kalaallit Nunaanni suliniutinik angisuunik ukkataqarnissaanik isumaqanngilaq, suliffeqarfissuup pisortaa Rasmus Untidt oqarpoq.

Erngup nukinganik nukissiorfiliornerit aallukkusukkaat

MT Højgaardip suliffeqarfissua Danmarkip avataani suliassaqarfinni aalajangersimasuni, soorlu erngup nukinganik sanaartornermi misilittagaqarfigisatsinni, taamaallaat immikkut suliniuteqarniarpoq, oqarpoq.

- Danmarkip avataani suliniutit suleqatit suleqatigalugit suliarineqartassapput, sulisullu eqqortut toqqarneqartassallutik. Danmarkip avataani suliffeqarfinnik aalajangersimasunik akisuunillu pilersitsisoqartassanngilaq, Rasmus Untidt naqissusiivoq.

Arssarnerit ikilisaaffigineqartut

Arssarnerit tunisinermigut sulianillu allamut tunniussinermigut ikilisaaffigineqarsimavoq, taamaalilluni Nuummi eqqaanilu teknikkikkut suliaqarneq pingaarnerpaatut aallutilerlugu.

- Suliffeqarfiup Kalaallillu Nunaani pisuussutit kingulliit 2025-mi tunineqarnissaannut aallarniutaalluarpoq, Rasmus Untidt oqarpoq.

Arssarnerit Qaqortumi, Sisimiuni Kangerlussuarmilu immikkoortortaqarfii pingasut Nuummilu inissiat pingasut 2024-mi tunineqarput. Tamatuma saniatigut ruujorilerinermut immikkoortortaq Nuullu avataani sanaartornissamullu isumaqatigiissutit marluk tunineqarput.

Taamaalilluni suliffeqarfissuup Arssarnerit teknikkimut tunngasunik niuertarfiata Nuummilu inissiaataasa marluk tuninissaat kisiat amigaatigaa.

MT Højgaard Grønlandip Pituffimmi sakkutooqarfimmi suliassaq, suliaqarfiit containerinik inissiallit pingasut aamma Nuup eqqaani betoniliorfik siorna tunivai. Taakkua saniatigut sanaartornerit kingulliit inaarsarneqassapput.

- Nunani tamalaani suliat kingulliit ingerlanneqaannassapput. Danmarkimi niuerfiup avataani suliffeqarfissuup suliassat ataasiakkaat aalajangersimasut suliaqarfigisassani aalajangersimasuni, suliffeqarfissuup neqeroorutigisinnaasani, taamaallaat suliarissavai – assersuutigalugu imermi sanaartornermi.