MT Højgaardip aamma Arssarnerit pisortaat: - Nunanit allamiunik sulisussarsiortarnermi Kalaallit Nunaat katataavoq
Sanaartornermik ingerlatsiviit sulisussaaleqipput, aaqqissuussinermilli peqannginnera pissutigalugu sulisunik nunanit allaneersunik sukkasuumik sulisussarsinissaq ajornarpoq. Ingerlatsiveqarfik massakkorpiaq sulisunik 50-inik amigaateqarpoq.
Sulisussaqarniarneq kipiluttunarpoq, pingaartumillu sanaartornermik ingerlatsiviit sulisussaaleqipput. Sulisartut nunanit allaneersut piukkunnartut piginnaasallillu ingerlatsiviit amigaatigisorujussuuaat.
Sulisartunik nunanit allaneersunik sukkasuumik sulisussarsisinnaaneq eqqarsaatigalugu Kalaallit Nunaat nunanut allanut sanilliullugu katataasimavoq. Tamatumunnga pissutaavoq Kalaallit Nunaannut sukkasuumik aaqqissuussineq atorsinnaasoq politikkikkut ingerlanneqarsinnaasimanngimmat. Tamanna pakatsinaqaaq.
Taamatut oqarpoq Torben Nielsen, taannalu entreprenøritut ingerlatsivissuup MT Højgaard Internationalip Kalaallit Nunaanni ingerlataani innaallaagissamillu attavilersuinermik ingerlatsiviup Arssarnerit pisortaaneraat.
Ingerlatsiviit taakkua marluk massakkorpiaq sulisartunik amerlanerusunik atorfissaqartitsipput.
- Sanasunik piginnaasalinnik amigaateqarpugut. Sulisussaqaraluarpat ingerlatsivinni marlunni pisortaaffigisanni sulisut nutaat katillugit 50-it aqagu atorsinnaagaluarpakka. Ajoraluartumilli sulisartunut nunanit allamiunut najugaqarnissamut sulinissamullu akuersissummik pissarsinissaq suli qaammatinik pingasuniit sisamanut sivisussuseqarpoq. Tamanna ajornartorsiuterujussuuvoq, qangarsuarli neriorsorneqarsimagatta sukkasuumik sulisussarsisinnaanissaq inissinneqarsimasoq, Torben Nielsen oqarpoq.
Oqaluttuaq tamaat Sermitsiami sapaatip-akunnerani matumani saqqummersumi atuaruk, ugguuna iserfigisinnaavat: