MT Højgaardip nunatsinni suliffeqarfiutai marluk amigartooruteqarujussuarput

Sanaartornermik ingerlatsivik MT Højgaard Kalaallit Nunaat aningaasaqarnikkut ajornartorsiorpoq. Ingerlatseqatigiiffik siorna akileraareernermi maannamut annerpaasumik 100 millionit koruunit sinnerlugit amigartooruteqarpoq.

Ukiumi tamatumani sarfalerisut Arssarnerit akileraareernerup kingorna 82 millionit koruuninik amigartoorujussuarput.

Taamaalilluni ingerlatseqatigiiffiit taakku marluk, Danmarkimi sanaartornermik ingerlatsivissuit annersaasa tulliannit, MT Højgaard Holdiningimit pigineqartut, siorna katillugit 200 millionit koruuningajannik amigartooruteqarput.

MT Højgaard Holdingip aningaasaqarnermut pisortaata, Rasmus Untidtip kisitsisit Sermitsiamut ilisimatitsissutigai.

MT Højgaard Kalaallit Nunaat matuneqartussaq, siornatigut 300-nik sulisulik, suliffeqarfik ineriartorfiungaartoq sanaartornerpassuarnillu suliaqartartuusimavoq, pingaartumik Nuummi. Maanna 90-iinnarnik sulisulik pisortamit Maiken Bruun-Ringgaardimit aqunneqarpoq.

MT Højgaard Kalaallit Nunaat piginnittumit MT Højgaard Holdingimit matusussanngortinneqarpoq.

- Kalaallit Nunaanni suliffeqarfik immaqa tunisinnaavarput, tamannali ajornakusoortussaq. Suliassat marluk ukioq manna naammassineqartut saniatigut suliassaqanngilaq. Tamanna pissutigalugu MT Højgaard Kalaallit Nunaanni pigisavut, ilaatigut Nuummi betoniliorfik aamma tammaarsimaffiit ilaat tunissavavut, aningaasaqarnermut pisortaq Rasmus Untidt oqarpoq.

Atortut akitsorujussuartut

Suliniutit ukioq manna naammassineqartut tassaapput Nuummi mittarfissami sanaartornerit Nuummilu kollegiat. Mittarfimmi sanaartornermi illorsuaq, timmisartunik angalasunik aqutsiveqarfimmik aamma illumik kiffartuussiffimmik sanaartorneq pineqarput.

Siorna MT Højgaard Kalaallit Nunaanni amigartoorutit annertuut Nuummi mittarfiliornermi kiisalu Qaqortumi Nuummilu kollegianik sanaartornerni annertuumik amigartooruteqarnernik pissuteqarput, sanaartortitsisunullu akigitinneqartussat aalajangersimasut pillugit isumaqatigiissuteqarsimagamik. Tamatuma saniatigut 100 millionit koruunit sinnerlugit annaasaqarnermut ilaapput pigisat nalikilliartornerat.

- Isumaqatigiissutit aalajangersimasumik akillit atortussanullu akit qaffarujussuarnerat MT Højgaard Kalaallit Nunaannut ilaatigut sunniuteqangaatsiarpoq, aningaasaqarnermut pisortaq oqarpoq.

MT Højgaard Kalaallit Nunaat ukiut arlaqanngitsut matuma siornatigut nunatsinni sanaartornermik suliaqartartut annersaasa ilagaat.

Ingerlatseqatigiiffik piginnittuusoq Kalaallit Nunaanni, Savalimmiuni, Portugalimi aamma Afrikamilu suliaqarfinnit tunuarluni sulianik arlalinnik tunisaqarniarluni siorna periusissatut aalajangerpoq.

MT Højgaard Holdingip Kalaallit Nunaanni immikkoortortaqarfia, MT Højgaard Kalaallit Nunaat matuneqaraluartoq, qallunaat sanaartortitseqatigiiffissuat sanaartortitseqatigiiffinnut tunniunneqartunut suli qularnaveeqqusiisussaavoq, aningaasaqarnermut pisortaq Rasmus Untidt oqarpoq.

- Ingerlatseqatigiiffipput aningaasanik niuerfimmut nalunaarsorneqarsimasoq 1918-imi pilersinneqartoq nersornaaserneqarluarsimavoq. MT Højgaard Kalaallit Nunaata qularnaveeqqusiinermut tunngatillugu suliassai nammineq Danmarkimi suliffeqarfitsinnit imaluunniit kiffartuussinermik pisiatsinnit suliarineqassapput, taanna oqarpoq.

MT Højgaard Kalaallit Nunaata Nuummi kollegiat Namminersorlutik Oqartussanut apriilip naanerani maajillu aallartinnerani tunniutissavai, Nuummilu mittarfiit illutaat pingasut aasaanerani mittarfinnik ingerlatsisumut KAIR-imut tunniunneqassapput.

MT Højgaard Kalaallit Nunaata qaqugu atorunnaarnissaa, Rasmus Untidtip oqaatigisinnaanngilaa.

MT Højgaardip Danmarkimi suliffeqarfissua siuariartorluarluni angusarissaarpoq.