MT Højgaardip pisortaa: Sulisartut nunanit allamiut Kalaallit Nunaata nunanut allanut annaavai
Nunanit allamiut amerlasuut, MT Højgaardimut isumaqatigiissuteqarsimasut Kalaallit Nunaanni sulilernissamut najugaqarnissamullu akuersissut utaqqisinnaanngilaat. Taarsiullugu nunanut allanut suliartortarput, pisortaq Torben Nielsen oqarpoq.
Kalaallit Nunaanni sulisitsisut nunanit allamiunik Kalaallit Nunaanni sulisitsilernissartik ajornakusoortikkaluttuinnarpaat. Tamatumunnga pingaartumik pissutaavoq ingerlatsiviit sulisunik EU-meersunik Nunanillu Avannarlerneersunik, atorfinitsitaanissamik isumaqatigiissuteqarfigisaminnik, atuilernissaminnut suli sivisuumik utaqqisariaqarmata.
Aviisi Sermitsiaq taama allappoq.
Taamaattumik nunanit allamiut nunanut allanut suliartuinnartarput, Kalaallit Nunaanni sulilernissaminnut Styrelsen for International Rekruttering og Integrationimit, Siri, akuersissut utaqqisinnaannginnamikku.
- Sanasut nunat allamiut atorfinitsitavut amerlasuut Kalaallit Nunaannukarnissartik taamaatiinnartarpaat. Sukkasuumik sulilernissartik piumanerusarpaat.
Taamatut Sermitsiamut oqarpoq nunami entreprenøritut ingerlatsiviit annersaasa ilaanni, MT Højgaardimi, pisortaaneq Torben Nielsen.
Fast trackimik aaqqissuussinertut taaneqartartoq, Sirimit ingerlanneqartoq, ingerlatsiviillu sulisuminnut EU-meersunut Nunanillu Avannarlermeersunut sulilernissamut najugaqarnissamullu qinnuteqarfigisartagaat, kinguarsaasuusarpoq.
- Nunanit EU-mut ilaasortaneersut amerlasuut uagutsinni sulilernissaminnut soqutiginnipput. Amerlanerpaalli uniinnartarput, Danmarkimi, Tysklandimi, Sverigemi nunaniluunniit allani ajornannginnerujussuarmik suliffittaarsinnaagamik. Taamaattumik Kalaallit Nunaata ajoraluartumik qinnuteqartut kingulliit kisiisa pisarsiarisinnaasarpai. Uagutsinnut, suliniutinut Kalaallit Nunaannullu, iluaqutaasorujussuussaaq sulisartut nunat allamiut, sulisinnaanermut najugaqarsinnaanermullu qinnuteqaatit Siri-mut tunniunneqaannavissut, Kalaallit Nunaanni sulilersinnaasuuppata, MT Højgaard Grønlandip pisortaanera Torben Nielsen oqarpoq, ingerlatsivillu taanna Danmarkimi entreprenøritut ingerlatsivissuup MT Højgaardip, nunani tamalaani suliarpassuarnik ingerlatsisartup, ilagaa.
Aviisimi Sermitsiami atuarnerusinnaavutit. Aviisi uani pissarsiariuk: