Múte B. Egedep aatsitassarsiorneq pillugu ataatsimiinnerit taamaatippai
Aatsitassanut naalakkersuisoq, Múte B. Egede, ukiormanna nunat tamalaat aatsitassarsioqatigiiffiisa Torontomi ataatsimeersuarneranut isumalluartorujussuugaluarpoq. Kisianni Kim Kielsenip qinersisoqarnissaa nalunaarutigimmagu ataatsimiinnissat tamaasa taamaatillugit angerlapallappoq.
Kim Kielsenip ataasinngormat qinersisoqarnissaanik nalunaaruteqarnera, aatsitassarsiornermik suliaqartut nunani tamalaani aningaasaliisartuinut Nunatta pilerisaarineranut kinguneqartitsivoq.
Isumasioqatigiinneq
Ataasinngornermi ualikkut qinersinissaq nalunaarutigineqarmat, Nunatsinnit aallartitat aatsaat taama amerlatigisut aatsitassarsiornermi aningaasaliisinnaasut nunarsuarmit tamaneersut, Kalaallit Nunaannut kisimi tunngassuteqartumik immikkut ittumik isumasioqatigiinnermut peqataapput.
Aaqqissuussaq PDAC-mi saqqummersitsinerup ilagaa, tassani aatsitassarsiornermik suliaqartunit 25.000-nit amerlanerusut naapittarput.
Qineqqusaarneq piviusunngortoq Múte B. Egedep paasigamiuk, ataasinngornermi unnukkut timmisartoq siulleq atorlugu Torontomit aallarniarluni aalajangerpoq.
Aningaasaliisartunik ataatsimeeqateqarnissat taamaatinneqartut
Ataatsimiinnissat arlallit Múte B. Egedep peqataanissaanut pingaarutillit taamaatinneqarnerannik tamanna kinguneqarpoq. Aatsitassarsiornermut naalakkersuisoqarfik taarsiullugu, naalakkersuisoqarfimmi pisortaq siuttoralugu aningaasaliisartunik allanillu aatsitassarsiornermik suliaqartunik ataatsimeeqateqarnissat naammassissavaat.
PDAC-mi saqqummersitsineq pilersaarut malillugu pingasunngorpat naammassissaaq.