Múte: Kissaatigisatsitut alloriarneq - sulili nunatsinniinnerunissamik kissaatitsinnut aqqut takivoq
Naalakkersuisut siulittaasuat, Múte Bourup Egede (IA) naammagisimaarinnippoq RG Naalakkersuisut 10. maj ingerlatseqatigiiffik ataatsimeersuarmat piumasaqaataanut qanillattorluni alloriarmat- aqqulli suli takivoq, taanna naliliivoq.
Naalakkersuisut, ingerlatseqatigiiffinnut piginnittuunermut tunngatillugu politikkimik nutaamik martsimi tamanut tusarliussaqarnikuupput, tassani ingerlatseqatigiiffiit ullumikkumit annertunerusumik nunarput aallaavigalugu suliaminnik ingerlatsinissaat piumasaqaatigineqarpoq.
Tamanna aallaavigalugu Royal Greenland aqutsisoqarnermigut nunatsinniit aallaaveqarnerunissamik nalunaaruteqarnera Naalakkersuisut siulittaasuannit oqimaalutarneqarluaqqaarluni isummerfigineqarpoq.
- Ingerlatseqatigiiffiup aqutsisuisa nunatsinni najugaqarnissaanik piumasaqarnitsinnut alloriarnertut siullertut isigaarput. Naatsorsuutigaarput ingerlatseqatigiiffiup naatsorsuutigisagut naapertorlugit aqutsisoqarnermigut nunatsinniit aallaaveqarnerunissamik piumasaqarnerput malikkumaaraa, ingerlatseqatigiiffiup qitiusumik allaffeqarnermigut nunatsinni annertusaareernerata kingorna.
Naalakkersuisut siulittaasuata 10. maj Royal Greenland ataatsimeersuarmat ingerlatseqatigiiffimmut piumasarinikuuaa ingerlatseqatigiiffiup aqutsisuisa nunatsinni najugaqarnissaannut pilersaarummik saqqummiussissasoq, pilersaarullu taanna septemberi naatinnagu piareereersimassagaa.
Ingerlatseqatigiiffiit nunatsinnit aallaaveqarnerullutik sulinissaannut piumasaqaat pingaartumik ingerlatseqatigiiffinnut nunatta avataani ingerlatsisunut Naalakkersuisut piumasaqarnikuupput nunatsinnit aallaaveqarulissasut. Pingaartumik Royal Greenland matumani pineqarpoq, taanna ingerlatseqatigiiffiuvoq nunarsuaq tamakkerlugu aalisarnermik aalisakkanillu tunisassiornermik ingerlatsiviusoq ukiumullu milliardilikkaannik kaaviiartitsisussusoq.
Naalakkersuisut piumasartik attappaat
Naalakkersuisut siulittaasuata, Múte Bourup Egede (IA)-p qisuariarnera paatsuugassaanngilaq. Taannami kissaateqarpoq Naalakkersuisut piumasaqaataat suli annertunerusumik timitalersorneqassasoq, tassalu nunatsinnit aallaaveqarnerunissamik piumasaqarneq suli annertunerusumik naammassiniarneqassasoq:
- Erseqqissaatigissavara, Naalakkersuisunit ingerlatseqatigiiffimmut piumasaqaativut soorunami attakkatsigit, taammaammallu naatsorsuutigaarput ingerlatseqatigiiffiup piumasaqaat suli annertunerusumik naammassissagaa, maannakkut tusarliunneqartumut sanilliullugu, Múte Bourup Egede Sermtisiaq.AG-mut oqarpoq nangillunilu:
- Soorunami paasisinnaalluarpara ingerlatseqatigiiffiup pisariaqartikkaa aaqqissuussaanikkut iluarsisariaqakkaminut piffissaqartinneqarnissamik pisariaqartitsinera, ilaatigut qullersaqarfiup illorsuata mikivallaalersimasup sulisut amerlassusaannut naleqqussarneqarnissaa, tamannami aamma ataatsimeersuarnermi oqaatigineqarpoq. Taamaattorli oqaatigeqqissavara, Naalakkersuisunit pimasaqaativut naammassineqassasut naatsorsuutigaarput, taamaammallu naatsorsuutigaarput ingerlatseqatigiiffiup tamanna naammassiniarlugu suli annertunerusumik iliuuseqassasoq, Naalakkersuisut siulittaasuat Múte Bourup Egede (IA) oqarpoq.