Naalakkersuisooqatigiit isumaqatigiissutaat tunulliunneqarput

Aningaasaqarnermut inatsimmut siunnersuummi ukiumi matumani 85 million koruunit pallillugit amigartoornissaq Naalakkersuisunit ilimagineqarpoq, 2018-imili naatsorsuutit oqimaaqatigiilissapput, aningaasaqarnermut naalakkersuisoq Anda Uldum, Demokraatit, tallimanngornermi nalunaaruteqarpoq.

‘Ataatsimoorluta kivitseqatigiissaagut’ Naalakkersuisut aningaasanut inatsisissatut siunnersuut 2015-imoortoq atersimasaat Inatsisartuni partiinut tamanut oqariartuuteqarpoq.

Aningaasanut inatsisissaq pillugu isumaqatiginninniarnissat aallartinneqassapput, inuillu tamarmik eqqarsarluartariaqarput, Kalaallit Nunaata aningaasaqarnera unamminartorsiorpoq. Pituffimmiit isertitat ikilissapput, raajat pisassat aamma ikileriarput illuatungaanilu utoqqaat amerliartuinnarput innuttaasullu sulisinnaassuseqartut ikiliartorlutik.

Pisortat aningasartuutaat killiliiffigineqassapput, tassanilu ukiumut 50 million koruunit ingerlatsinermiit sipaarniutigineqassallutik. Pisortat aningaasartuutaat iluarsartuusseqqinnertigut ikilisinneqassapput, ilaatigut isertitaqassuseq malillugu akileraartitsilernikkut, aningaasaqarnermut naalakkersuisoq taama oqariartuuteqarpoq.

Naalakkersuisooqatigiit sukarutaat tunulliunneqarput
Naalakkersuisooqatigiit Siumut, Demokraatit, Atassullu naalakkersuisooqatigiinnissaminnut isumaqatigiissutissartik december 2014-imi saqqummiuppaat. Isumaqatigiissut sisamanik sukarsualik. Sukarsuilli taakku aningaasamut siunnersuummi 2015-imi atuuttusami tunulliunneqarput.

Isumaqatigiissut malillugu Naalakkersuisut sulissutigisussaavaat Qaqortup, Narsap aamma Tasiilap nutaamik timmisartoqarfittaarnissaat. Ilulissat timmisartoqarfiat allineqassaaq, Nuup timisartoqarfialu atlantikoq ikaarlugu timmisartoqarfinngortinneqassalluni. Qeqertarsuaq, Qasigiannguit, Kangaatsiaq Nanortalillu ujaraaqqanik qallikkamik mittarfeqalernissaattaaq siunniunneqartut isumaqatigiissummi allassimapput.

Mittarfiilli neriorsuutillu allat tunulliunneqarput. Aningaanik mittarfiliornissamut aningaasamut siunnersuummi atorneqartussanik illikartitsisoqanngilaq. Naalakkersuisut siullermik misissueqqaarniarput, suut naalakkersuisooqatigiit isumaqatigiissutaanni siunniunneqartuni salliutinneqassanersut, taama aningaasaqarnermut naalakkersuisoq Sermitsiaq.AG-mut nalunaaruteqarpoq.

- Naalakkersuisut ukiup affaata siulliup ingerlanerani mississuinerit ingerlatissavaat. Naalakkersuisooqatigiillu isumaqatigiissutaasa sorliit salliutinneqassanersut pilersaarusiorlugu. Ukiamut Inatsisartut ataatsimiinnissannut siunnersuutissatut saqqummiunneqartuni ilaatinneqassapput angallannerup ineriartortinnissaanut aningaasaliiffigineqarnissaanullu siunnersuutissat, Anda Uldum naqissusiivoq.

Sanaartornerit suliffissaqartitsilissapput
- Aningaasalersuinerup ilaa akilersuutit erniallu aningaasaliinermi isertitatigut akilerneqarsinnaanissaat pillugu Naalakkersuisut tunngavii eqqarsaatigalugit pisortanit taarsigassarsinikkut pisinnaavoq. Aammattaaq namminersortut aningaasaliisuusut mittarfiliornermut aningaasalersuerusussinnaanissaat misissorneqassaaq. Kiisalu sanaartornermik ineriartortitsinermillu sulinerit suliffissaqartitsinermik sapinngisamik siuarsaaviusumik ataqatigiissaarniarneqarlutillu aaqqissuunniarneqarput. Anda Uldum allappoq.

-Tamatuma aamma kinguneraa aningaasanut inatsisissatut siunnersuummi matumani mittarfiliornissanut aalajangersimasunut aningaasanik immikkoortitsisoqarani misissueqqaarnernuinnaq aningaasaliisoqarnera, aningaasaqarnermut naalakkersuisoq naqissusiivoq.

Naalakkersuisooqatigiit isumaqatigiissutaat allat aamma tunulliunneqarput. Naalakkersuisut aalisarnermi inerisaanermut aningaasat 20 million koruunit 2014-imi atorneqartut uani siunnersuummi peersimavaat. Nunami inuussutissarsiutit takornariaqartitsinerlu siuarsaaffigineqarnissannik naalakkersuisooqatigiit suleqatigiissutissatut oqariartuutaat tunulliunneqarportaaq.

Pisuussutinik uumaatsunik tunngavigaluarit suliffissuaqartitsilernissamut aningaasartuutissanik nutaanik aamma ‘Ataatsmoorluta kivitseqatigiissaagut’-mi ersittoqanngilaq.