Naalakkersuisoq: Erngup nukiganik nukissiorfiliornissamut aningaasaleerusuttut qulit oqaloqatigineqarput
Avatangiisinut nukissiornermullu naalakkersuisoq Kalistat Lund (IA) ataasinngornermi tusagassiortunik katersortitsinermi ilisimatitsivoq suliffeqarfissuit qulit missaat erngup nukiganik nukissiuutiliornissamut aningaasaliinissamut soqutiginnittut oqaloqatigineqartut.
Suliffeqarfiit nunanit tamalaaneersut qulit missaanniittut Kalaallit Nunaanni erngup nukinganik nukissiorfissuassanut marlunnut aningaasaliiniarlutik oqaloqatigiipput. 2022-mi Naalakkersuisut aningaasaliisinnaasunik neqeroortitsinermut atatillugu oqaloqatigiinnissamut qaaqqusipput, naalakkersuisullu akisussaasup soqutiginninneq annertusoq nuannaarutigaa.
Erngup nukinganik nukissiorfiliorfissatut piukkunnaatilliit marluk, Tasersiaq aamma Tarsartuup Tasia, Maniitsup Nuullu eqqaanniipput, taakkulu inuiaqatigiit pisariaqartitaannit annertunerungaatsiartumik nukissiorsinnaapput.
- Suliniutit pillugit aningaasaliisinnaasunik oqaloqateqarluarpugut. Suliffeqarfissuit soqutiginnittut misissorpavut, naatsorsuutigaaralu ukiup naannginnerani suliffeqarfiit oqaloqatigisavut sisamaannanngortissinnaagivut, avatangiisinut nukissiornermullu naalakkersuisoq Kalistat Lund (IA) ataasinngornermi januaarip 22-ani tusagassiortunik katersortitsinermi oqarpoq
Ukiut arlallit qaangiuppata nukissiorfeqalissaaq
Kalistat Lundip naatsorsuutigaa aningaasaliisartunik oqaloqateqarneq ukiuni arlalinni ingerlassasoq. Erngup nukinganik nukissiorfiliorluni sanaartornerit kingusinnerpaamik 2028-mi aallartinnissaat naatsorsuutigineqarpoq, nukissiorfiillu atulernissaat kingusinnerpaamik 2035-mi aallartittussatut naatsorsuutigineqarluni.
- Aningaasaliisussanik isumaqatigiissuteqannginnermi arlalinnik misissugassaqarpugut. 30 milliardit koruunit pallillugit aningaasaliisoqarnissaa pisariaqarpoq, taamaattumik suliaq mianersorluni suliarineqassaaq. Soqutiginnittoqarluarmalli isumalluarpugut, naalakkersuisoq oqarpoq.
Nukissiuuteqarnermut naalakkersuisup erseqqissarpaa nunat arlallit nukissiuuteqarneq ataavartoq soqutigigaat, nunallu amerlasuut maannakkut ikummatissanik nunap iluaniittunik atuiunnaariartorlutik nukissiuutinik ataavartunik atuineruleriartortut.
Aningaasarsiornermut periarfissat
- Suliaq sukkanerusumik ingerlassinnaanngilarput, suliarinnittussarsiuussinermi misissuinerit amerlanerusut pisariaqarmata. Piffissami tulliuttumi ingerlatseqatigiiffiit tatiginartuunerat soqutiginninnerallu misissussavagut. Aamma misissussavarput aningaasaliisartut suliamik isumaginnissinnaanersut. Suliniuteqarnitsinni tatiginartuuneq pimoorussinerlu takutittariaqarparput, Kalistat Lund erseqqissaavoq.
Tasersiaq 750 megawatt-it missaannik nukissiortitsisinnaasutut uuttuunneqartoq, Tarsarsuup Tasia 250 megawatt-it missaannik nukissiorsinnaasutut naatsorsorneqarsimavoq. Tamanna Kalaallit Nunaanni innuttaasut ukiumut pisariaqartitaannit annertunerujussuuvoq. Taamaammat Naalakkersuisut suliniutit siunissami isertitaqarnissamut periarfissatut isigaat, nukissiornerup sinnera nunanut allanut tunineqartassammat.