Naalakkersuisut: Attaveqaatit ammanerulersinneqarnissaat naaggaarneqarpoq
Nalunaarasuartaatikkut attaveqaatit ammarneqarpata aningaasaqarneq aamma pilersuinerup qulakkeerneqarnissaa eqqornerlunneqarsinnaapput, atortulersuutinut naalakkersuisoq Hans Peter Poulsen oqarpoq.
Niuernerup ammanerulersinneratigut nunanit allaneersut satellitsikkut attaveqaataat innuttaasunut inatsisitigut Atassut Nalerarlu atuisinnaalersitserusunnertik iluatsissinnaanngilluinnarpasippaat.
Pele Brobergimut Naleqqameersumut paragraf 37 naapertorlugu akissummini Hans Peter Poulsenip sooq tamanna isumassarsiatsiaalanngitsoq nassuiarpaa.
Aningaasarsiorniartut
- Qaammataasiaq atorlugu attaveqaatinik sullissinermik allanik qinigassaqarnermi naatsorsuutigisinnaavarput, nuanit allanit nalunaarasuartaatinik neqerooruteqartartut aningaasanik isaatitsissutigisinnaasaminnik, aningaasaqarnikkullu imminut akilersinnaatillugu nalunaarasuartaatitigut sullissinermik taamaallaat neqerooruteqartassasut.
Aamma atuaruk: Pasitsaassineq: Qaammataasiatigut attaveqaatit unioqqutitsilluni atorneqartut
- Taamaalilluni Tusass A/S isertitatigut annaasaqassaaq, nalunaarasuartaatitigullu attaveqaatinut aningaasartuutigisartagaat ammaassinikkut ikilinatik. Tamanna Tusass A/S-ip Kalaallit Nunaanni nalunaarasuartaatitigut attaveqaatinik aserfallatsaaliuisinnaaneranut ineriartortitsisinnaaneranullu unammillernartitsissasoq nassuiaavoq, erseqqissarneqarporlu ammaassineq "pilersuinerup qulakkeerneqarnissaanut sunniussinnaasoq".
Tusass A/S-ip qaammataasanik attaveqaatit Hisparsat aamma OneWeb isumaqatigiissuteqarfigereerpai, Starlink-ilu, innuttaasunit arlalinnit unioqqutitsilluni atorneqartartoq Nalunaarasuartaateqarnikkut aqutsisoqarfik pasitsaassimasaa, isumaqatigiissuteqarfiginiarlugu sulissutigineqarpoq.
Nassuiaasiortoqassasoq
Tamannali pissutigalugu Hans Peter Poulsen ajornartorsiummik itinerusumik misissuilerpoq.
- Naalakkersuisut Starlink qaammataasiarlu atorlugu attaveqartitsisartut allat eqqumaffigaat, teknologilu nutaaq Kalaallit Nunaanni innuttaasunut iluaqutissanngorlugu atorluarnissaa kissaatigaarput. Taamaattumik qaammataasiaq atorlugu attaveqaatinik neqerooruteqartartut pillugit nassuiaasiornissaq aallartippara, naleqquttumik oqallissinnaaniassagatta, naalakkersuisoq oqarpoq, nassuiaallu naammassisaq Inatsisartuni politikerinut upernaakkut ataatsimiinnermi nassiunneqarsinnaajumaarnissaa naatsorsuutigalugu.
Hans Peter Poulsenip akissutaa tamaat atuaruk