Naalakkersuisut: Kunngeqarfik IWC-mut ilaasortaaginnassaaq

– Kalaallit Nunaata kissaatigaa Nunani Tamalaani Arfanniarnermut Kommissioni, IWC, siunertani malillugit ingerlassasoq, ineriartorsimanermisut eqqissisimatitsinermik ingerlatsivittut pinnani.
Taamatut tikkuaavoq aalisarnermut, piniarnermut nunalerinermullu Naalakkersuisoq Karl Lyberth, Siumut.
Taamatiut oqarpoq pissutigalugu Naalakkersuisut arfattassanik namminneq aalajangiinerannik oqallinneq qallunaat tusagassiorfiini sammineqaqqilermat.
– Kalaallit Nunaata anguniagariuarsimavaa siunissamut aaqqiissutissamik nassaarniarnissaq, IWC-p tullianik 2014-imi ataatsimiinnerani 2014-imiit 2018-imut arfattassanik aalajangiiniarnissami.
– Naluneqanngitsutut naammaginngilarput IWC-p angisuunik arfattassiinermini nammineq ilisimatuumi inassuteqaatai malinngimmagit. Tamannali tunuliaqutaralugu Kalaallit Nunaata anguniagarinagulu kissaatiginngilaa kunngeqarfik IWC-mit anissasoq, Karl Lyberth oqarpoq.
Taanna malillugu Kalaallit Nunaata kissaatigaa IWC aalajangiusimatinneqassasoq arfattassanik aalajangiisarnermut, nungusaataanngitsumik atuinissaq eqqarsaatigalugu. Ilanngullugu oqaatigaa siunertamut tamatumunnga ingerlatsivik ilumini nukittorsarneqarnissaminut pisariaqartitsisoq.
Atuaruk "Nunatta arfattassat aalajangiuppai"
Kalaallit Nunaat avaqqullugu aalajangiisoqarsinnaanngilaq
Kunngeqarfimmi Kalaallit Nunaat kisimi angisuunik arfanniartartuuvoq.
– Kunngeqarfik ilaasortaanerminik, imaluunniit ilaasortaanermi ilaanik, atorunnaarsitsissappat tamanna Inatsisartunut saqqummiunneqassaaq Namminersornermut inatsit naapertorlugu. Taamaattumik naalagaaffeqatigiit tamaasa sinnerlugit Danmarki kisimi aalajangiisinnaanngilaq, Kalaallit Nunaat Savalimmiullu isumasioqqaartinnagit, Karl Lyberth nassuiaavoq.
2013-imiit arfattassat amerlinissaannik Kalaallit Nunaata kissaataa IWC-p ilisimatuussutsikkut komitéanit taperserneqarpoq, siorna juulimi kommissionip ukiumoortumik ataatsimiinneranut atatillugu. Kalaallilli Nunaata arfattassanik siunnersuutaata kommissionimi taasinermi politikkikkut naammattumik taperserneqanngilaq.
– Kalaallit Nunaat piareersimasimavoq IWC-mut nalunaarutigissallugu Kalaallit Nunaanni arfanniarneq nanginneqarallassasoq, Kalaallit Nunaata nunap inuiisut inuuniarnermi pisariaqartitai naammassiniarlugit, IWC-lli ilisimatuussutsikkut siunnersuinera tamakkiisumik ataqqillugu, Karl Lyberth oqarpoq.
Ukioq manna ukiut nikinneranni taamanikkut Naalakkersuisuusut 2013-imi angisuunik arfattassat 221-nut amerlivaat, taamaasilluni ukioq manna tikaagulliusaat 19-it, arfiviit marluk, qipoqqaat qulit tikaagulliillu 190-it pisarineqarsinnaallutik.