- Naalakkersuisut uppitilersaanngilagut
- Ekstra Bladet ingasattajaarpoq. Naalakkersuisut uppitilersaanngilagut, Folketingemut ilaasortaq Sjurdur Skaale oqarpoq Estra Bladetimilu allaaserisaq ajuusaarutigalugu
Savalimmiormiup Folketingemut ilaasortap Sjurdur Skaalep Javnaðarflokkurinimeersup (Socialdemokraatiusut) marsip17-ani Ekstra Bladetimi allaaserisaq eqqunngitsuunerarlugulu ajuusaarutigaa, allaasineqarsimalluni naalakkersuisunik tapersersuinerminik taamaatitseriaannaalluni, ministeriuneq Helle Thorning-Schmidt Socialdemokratineersoq Savalimmiunut pitsaasumik makrellitassiinngippat.
Allaaserisami tunngaviuvoq EU-p ministerrådiani siunnersuutigineqarmat Savalimmiormiut pillaatisisinnaassasut Danmark pisussaaffilerneqarpat naalagaaffeqatigiinnermi qiterlerpaasumut niuernikkut pillaaniarnermi peqataassaqsoq. Nunat Atlantikup avannaanut sineriarqartut, EU, Norge, Island Savalimmiullu isumaqatigiinniarnerat februaarip 16-ani isasoorput.
Læs "Makrellen kan vælte Helle"
- Oqarsimanerarneqarpunga "Savalimmiuni parteeqatikka uannut oqarsimasut naalakkersuisunik suleqateqarnera unitsissagiga", soorlu aamma allassimallunga piumasarigiga naalakkersuisut Savalimmiunut makrellitassanik amerlanerusunik pisassiinissaannik. Aamma oqaatigineqarpoq taakkuninnga aalisarneq Savalimmiunut 12 milliard sinnierlugit aningaasartaqartut. Tamakku tamarmik eqqunnillat, savalimmiormiu socialdemokraatiusoq gruppeqatiminut allappoq.
- Ekstra Bladet kukkuvoq
- Ekstra Bladetip allaaserisaa eqqunngilaq, allaaserisarlu naatsumik aviisimit oqaloqatigiinnitsinnik tunngaveqanngilaq, Sjurdur Skaale allappoq.
Sjurdur Skaalep allaaserisaq ajuusaarutigaa neriorsuutigalugulu siunissami tusagassiuutinit taamaattunit attaveqarfigineqaraangami mianersornerusalerniarluni.
- Suliaq pillugu naalakkersuisullu pitsaasumik oqaloqatigiippugut, Christiansborgemi suleqatiminut allappoq.
- Aaqqiissutissamik inooqataaffigisinnaasatsinnik aaqqiisoqarnissaa qularinngilara, Savalimmiuniit Folketingimut ilaasortaq oqarpoq.
Danmarkimi naalakkersuisut sulinissaminnut tunngavigisaannut ilaasut Atlantikup avannaani ilaasortat pingasuusut peqatigiilluartariaqarput naalakkersuisunullu akerliusumik taasillutik, EU naalagaaffeqatigiinnerup iluani ajornartorsiortitsilerpat.
Naalakkersuisut amerlanerussuteqarnissaminnut 92-nik ilaasortaqarput JF, IA Siumullu ilanngullugit. Partiit naalakkersuisuutitaqartut pingasut Enhedslistenilu katillugit 89-iupput, illuatungiliuttullu talerperliuniat Sambandspartilu katillugit 87-iullutik.
MInnerpaamik Atlantikup avannaani ilaasortat pingasut akerliullutik taasisinnaapput inatsisissatut siunnertuutit unitsillugot pingasullu naaggaarunik naalakkersuisuutitaqartut ikinnerussuteqalersissinnaavaat.
Nunatsinniit Folketingemut ilaasortat maannamut Ekstra Bladetip allaaserisaanut qisuarianngillat, Sermitsiaq.AG-mit saaffigineqarluarlutik.