Naatsorsuutit: Brugseni RAL-imit ajornartorsiortinneqaraluarluni angusarissaartoq
Naak Royal Arctic Linemit annertuumik kinguaattoortinneqartaraluarluni Brugseni ukioq kingulleq 782 million koruuninik kaaviaartitaqarluni aatsaat taama angusarissaartigaaq, tamanna ukiup siulianut sanillersuunnerani procentinik tallimanik qaffariaateqarfiuvoq.
Akileraarutit agguagarsiassallu suli ilanngaatiginagit 35 million koruunit sinneqartoorutigineqarput.
Illuutit nalikinnerusut
Aqutsisut naatsorsuutini nassuiaatigaat, illoqarfinni ilaliussinikkut sunniuteqarnerpaani illuutit 8 million koruuninik nalikillisaavigineqartariaqarsimasut, tamannalu ukiumut naatsorsuutini 27 million koruuninik angusaqarnermut pissuteqarpoq, tamannalu rekortiungallarpoq.
Royal Arctic Linemit kukkusumik tunniussisarnerit annertuumillu kinguaattoornerit 2017-imi ukiup sisamararterutaani Brugsenimut immikkut unammillersimavoq.
- Aammaarluta kusanartumik inerneqartunik takutitsivugut, naak ukioq kaajallapajaarlugu pisiassanik tikittoorniartarnigut unamminartoqartarsimagaluaqisut, aqutsisut nalunaarutaanni allassimavoq.
Kinguaattoornerit millionilikkuutaanik akeqarsimasut
Brugsenip pisortaanerata Susanne Christensen, Sermitsiaq.AG-mut paasissutissiaraa, Royal Artic Linep unammilligassaqartitsinera “minnerpaamik koruuninik millionilikkuutaanik” Brugsenimut naleqarsimasoq.
- Kisitsit naatsorsukannersimavara. Minnerunanimi immaqa angineruvoq. Kinguaattoornerit kaaviaartitanut qanoq kinguneqarsimanerat erseqqissumik nalunaarusiorsimanngilarput, Susanne Christensen paasissutissiivoq. Naatitat nioqqutissallu akuutissalersugaanngitsut kinguaattoortarneq pissutigalugu pisiniarfinniitillutik asiupallattarnerat Brugsenip annaasaqaatigisimavai.
Malunnaatilimmik pitsanngoriaateqarneq
- Piniakkallu ukioq manna Royal Arctic Linemit malunnaatilimmik pitsanngoriaateqarsimanera, oqaatigisariaqarpara, Brusenip pisortaanera naqissusiivoq.
Brugseni Qinngorput Nuup ilaaniittoq qaammatit siulliit sisamat ingerlatsinermi kaaviaartitai ukiup siulianut sanillersuunnerani 25 procentit missaanni qaffariaateqarsimapput.
Pisiffik qanittumi Qinngorpumi pisiniarfimmik nutaamik anginerusumillu ammaasussaanera, soorunami kaaviaartitanut aamma sunniuteqassaaq, Susanne Christensen naliliivoq.
Brugsenip Nanortalimmi Paamiunilu pisiniarfiutai angusarissaartitseqataasutut aamma taaneqarput.
Ilulissani sanaartorneq piffissaq malillugu ingerlasoq
Brugseni nutaaq angisooq Ilulissani sanaartorneqalerpoq. Sanaartorneq piffissaq malillugu ingerlanneqarpoq 2019-milu aasaq nallertinnagu pisiniarfiup ammarneqarnissaa naatsorsuutigineqarluni.
2017-imi Brugsenip, Brugseni Nuummi nillataartitsiviit/qerititsiviit, Brugseni Maniitsumi pisiniarfiup saavanik aserfallatsaaliineq siulleq, Nuummi sulisut inaat, Ilulissanilu nutaamik sanaartortitsinissaq, 41 million koruunit sinnerlugit aningaasaaliiffigisimavai.