Naja Holm KNAPK-mi pisortanngorpoq

37-nik ukiulik Naja J. F. Holm aalisartut piniartullu kattuffianni KNAPK-mi pisortanngorpoq.

Taanna Pinngortitamut Avatangiisinullu Naalakkersuisoqarfimmi AC fuldmægtigitut suliffimminngaanneerpoq, decembarip aallaqqaataani atorfinissaaq.

KNAPK tusagassiuutinut nalunaarummi taama ilisimatitsivoq.

- Naja Holmip suliassarissavai KNAPK-mi siulersuisuunerit, ulluinnarni aqutsisut aammalu kattuffimmi siulittaasoq kiisalu allaffeqarfimmi suleqatit qanimut suleqatigalugit ilaasortat soqutigisaasa anguniarnissaat, siulittaasoq Henrik Sandgreen, tusagassiuutinut nalunaarummi allappoq.

Ukiorpaalussuarni Petrus Biilmann aalisartut piniartullu kattuffianni pisortaanikuuvoq. Taanna apriilimi nutaamik atorfittaaqqammerluni toqukkut qimaguppoq.