Najaaraq Møller: Imminut pilersorsinnaaneq anguneqartariaqartoq

- Pisuussutit uumassusillit atorlugit Kalaallit Nunaata imminut pilersornerulerulernissaa tamakkiisumik anguneqassappat inuussutissaqarnermut oqartussaaffik tamakkiisumik nunatsinnut angerlaanneqartariaqartoq aammali nunatta EU-mik niueqateqarnera nalilersorneqartariaqarpoq.

Inatsisartunut ilaasortaq, Najaaraq Møller, Siumut, pineqartut pillugit paragraf 37 naapertorlugu Naalakkersuisunut apeqquteqartoq, isumaqarpoq.

Malittarisassat malinneqassasut

Aalisakkat, marlunnik qaleruallit qimerloqanngitsut, tinupasulimmik amillit, uumasut puullit imaanilu siuteqqut pillugit Kalaallit Nunaat Den Europæiske Unionimik, EU-mik, 2004-mili niueqateqartutut inissisimalerpoq, tassanilu inuussutissat kiisalu uumasunit perlukut nerisassaanngitsut taakkulu atorlugit tunisassiat aamma ilaapput.

- Taamatut inissisimanikkut Kalaallit Nunaata suliassaqarfinni taakkunani EU-mi malittarisassat maleruartussaavai, piffissamilu sivisuumi malittarisassat taakkununnga tunngasut atuutilersinneqartarsimapput, taakkulu nunatsinni inuussutissarsiuteqartunit ilisimaneqarluarput maleruarneqarlutillu. Taama Aalisarnermut Piniarnermullu Naalakkersuisoq Kim Kielsen, Siumut, Najaaraq Møllerimut akissuteqarluni allappoq.

Fødevarestyrelsi oqartussaasuusoq

Danmarkimi inuussutissalerinermut aqutsisoqarfik, Fødevarestyrelsi, Kalaallit Nunaani Uumasunut Nakorsaqarfimmi Inuussutissalerinermullu Oqartussaaffimmi, UNIO-mi, Namminersorlutik Oqartussanit aamma Danmarkimi Inuussutissat, Nunalerineq Aalisarnerlu pillugit Pisortaqarfimmit avillugu ingerlanneqartumi, sulianik assigiinngitsunik ingerlatsisuuvoq.

Fødevarestyrelsip, Naalakkersuisut aamma Kalaallit Nunaanni inuussutissarsiortut akornanni isumaqatigiinnerisigut nerukkaatissat pillugit malittarisassat killilimmik Kalaallit Nunaannut atuutilersinneqarsimapput, tassanilu aalisakkanit qajuusaasiat aalisakkanillu uuliat nerukkaatissanut atorneqartarnerat pillugu taamaallaat malittarisassiortoqrpoq, tamannalu malittarisassanik sinnilimmik atuutilersitsisoqarnissaa pinaveersaartinniarlugu taamatut aalajangertoqarnikuuvoq.

Puisi perlukutut

Puisinik tunisassiat EU-mi malittarisassanut naapertuutinngitsutut, soorlu perlukutut nerisassiassaanngitsut nalilerneqarput, taamaattumillu EU-mi nunanut ilaasortani, soorlu Danmarkimi, taakkunannga niuernikkut eqqussuinissaq akuerisaanngilaq.

Puisinit tunisassianik EU-mi malittarisassanut naleqqutinngitsutut isigineqarunnaassappata, EU-Kommissioni malittarisassiortariaqassaaq, taakkulu nunanut ilaasortanut tamanut tusarniutigineqartariaqassapput, Kim Kielsen paasissutissiivoq.

Nunanili EU-mut ilaasortaanngitsuni oqartussat puisip neqaanik eqquissuinissamut piumasaqaateqanngippat Fødevarestyrelsi avammut nioqquteqarnissamut akuleruttariaqanngilaq, suliffeqarfiullu puisip neqaanik tunisisussap nammineq akiligaanik akisussaaffigisaanillu niuerneq ingerlanneqarsinnaavoq.

Politikkikkut kissaatigineqartoq

Uumasunut Nakorsaqarnermut Inuussutissalerinermullu Oqartussaaffimmut akisussaaffik tamarmiusoq Kalaallit Nunaata tigussagaa politikkikkut kissaatigineqarpoq, ukiunilu kingullerni suliassaqarfiup tigunissaa misissorneqartarsimvoq, tamannalu piviusunngussappat suliassat suli arlaqartut, Kim Kielsen erseqqissavoq.

Allannguisoqarnissaanut piffissanngortoq

Nunatta pissarititai atorlugit imminut pilersorsinnaaneq anguneqassappat inuussutissalerinermut oqartussaaffiuk piaartumik angerlaanneqartariaqartoq, Najaaraq Møller isumaqarpoq.

- Inuussutissalerinermut oqartussaaffiup tamaat tigunissaa sulissutigineqartariaqarpoq, tamannalu Inatsisartunut qinersereernerup kingorna suliassat pingaarnerit ilagisariaqarpaat, tassami nunatut tunisassiorniaraanni tamanna nammineq oqartussaavigisussaammat.

- Inuussutissarsiutinimmi ineriartortitsiniarutta Naalagaaffimmut akuerineqarnissamut apereqqaartarnissaq pissusissamisuunngilaq, taanna oqarpoq.

Savalimmiuni oqartussaaffiit allilerneqarnerat ilutigalugu inuussutissalerinermut oqartussaaffik tiguneqarnikuusoq, tamannalu nunatta ilinniarfigisariaqaraa, taanna isumaqarpoq.

Nalilersuisoqartariaqartoq

EU-millu maannakkutut niueqateqarneq inuussutissarsiornikkut ineriartornissamut killiliisoq, Inatsisartunut ilaasoq isumaqarpoq.

- Naak EU-mut ilaasortaanngikkaluarluta malittarisassanut toqqaannanngikkaluamik kalluarneqarpugut, taamaattumillu EU-mut niueqateqarnerup nalilersornissaa pisariaqalersimavoq, tassami nunatut naalagaaffinngoriartuaartutut aningaasarsiorfissagut aammalu niueqatissagut pitsaasut ammatinnissaat pisariaqarluinnarmat.

- Kalaallit Nunaata nammineerluni ilusilersugaaanik nunarsuarmi niueqatigiinnermut peqaataasinnaasariaqarpugut, taamaaliunngikkuttami nunatut ineriartornissarput killilersimaarneqassaaq, taanna oqarpoq.

Puisit amiisa niuerutigineqarsinnaanerat EU-miit akuerisaavoq, taamaakkaluaq puisi tamakkiisoq nioqqutiginissaanut EU-mit akuerisaanngilaq.