Naleraq: Royal Greenlandip sioorasaarinera ingasattajaarneruvoq

Naalakkersuisut aalisarnermut inatsisissamut nutaamut tunngatillugu anguniagaat takorluugaallu nunatsinni aalassatsitsipput.

Aalisarnermut inatsisissatut siunnersuutip siullermeerneqarnerani tupaallannartumik illuatungeriit akornanni oqaloqatigiinneq pitsaasumik ingerlavoq. Inatsisartut ataatsimiittarfiata silataani pissutsit sakkortupput, partiit illuatungiliuttut tamarmik KNAPK-mit akerliussutsimik takutitsisut neriorsorpaat “aalisartut sinnerlugit ilungersorniarlutik”.

Maannali aappassaaneerneqarnissaanut, pingasunngornermi maajip arfineq-pingajuani pisussamut qanilliartortilluta, aalisarnermik inuussutissarsiuteqartut aalisarnermut inatsisip qanoq isikkoqarnissaanik kissaataat allanngorluinnarput.

Politikerinit akuerineqarnissartik anguniarlugu illuatungeriit pingasuupput: sinerissamut qanittumi aalisartut aamma avataasiorluni aalisartut, taakkualu marlukkuutaarput; umiarsuaatileqatigiiffiit namminersortut Royal Greenlandilu pisortanit pigineqartoq.

Maannamut ingammik Polar Seafoodip pissutsit ajornerulernissaat pinngitsoortinniarlugu akiuuttarsimagaluarpoq, siunissami aalisarsinnaaniassagami, maannali namminersortut allat aamma akiuuteqataalerput. .

RG-p Aningaasaqarnermut ataatsimiititaliaq Aalisarnermullu ataatsimiititaliaq ataatsimeeqatigai

Aalisarnerik suliffeqarfissuup pisortanit pigineqartup Royal Greenlandip ataatsimiititaliat ataatsimeeqatigisimagai, Sermitsiap nittartakkami aaqqissuisoqarfia ilisimatinneqarpoq, Aaqqissuisoqarfimmit Aningaasanut ataatsimiititaliami siulittaasoq, Asii Chemnitz Narup (IA) attaveqarfiginiaraluarparput, kisianni akinngilaq.

Naleqqamili siulittaasup Aningaasaqarnermut Ataatsimiititaliamut ilaasortap, Pele Brobergip oqarnera naapertorlugu, aalisarnermut inatsisissaq maanna ilusissamisut iluseqarluni akuerineqanngippat, imaluunniit inatsisissatut siunnersuummut tunngatillugu Royal Greenland ajornerusumik inissisimalissappat, kingunerisinnaasai pillugit Royal Greenland politikerinut sioorasaarisutut nassuiarpaa.

Naleraq partiitut aarlerisaarisimasoq aamma suliaq pillugu partiit sinnerinut isumaqatiginninniaraluarsimasoq, Pele Broberg oqarpoq.

- Soorunami ataatsimiititaliaq sinnerlugu oqaaseqarsinnaanngilanga, uppernarsarsinnaavarali Royal Greenlandimik ataatsimeeqateqarluta. Inerniliussinnaavara aalisarnermut inatsisissatut siunnersuut tassaasoq sukkavallaamik suliarineqartoq, Royal Greenlandip taassumalu pingaarnersiuinerlunneranik annaassinissamik taamaallaat siunertaqartoq:

Qanoq naleqqutinngitsut?

- Assersuutigalugu sinerissap qanittuani aalisartut arlallit oqaluttuarput Royal Greenland tunitsivinnik tunisassiornermillu ingerlatsisuusaartoq, tunitsivinnilli killilersuineq sukannerpallaartoq, Pele Broberg (N) oqarpoq nangillunilu:

- Ingerlatseqatigiiffiup tamakku aalisartunut iluaqutaanngitsut matuinnariaagai, aalisartut inerniliipput, taanna oqarpoq.

- Apeqqutima aappaat RG-p sunniiniarneranut tunngavoq. KNR-imi ulloq unnuarlu aallakaatitsisarput assigiinngitsorpassuarnik oqariartuuteqartarput, innuttaasunit nuannarineqarnissaq kisiat siunertaralugu. Qanoq angusaqarpat? Eqqumiiginartorujussuuvoq suliffeqarfiup inuiaqatigiinnit pigineqartup politikkikkut sulianut akuliuttariaqarnera, naak suliffeqarfik politikkikkut ingerlatsinermut akuliunniarnani oqariartuuteqarsimagaluartoq.

Pele Brobergip aamma tikkuarpaa Royal Greenlandip inuiaqatigiit aningaasaataannik nunani allani assigiinngitsorpassuartigut suliniuteqarnermini qanoq iluanaaruteqartartiginerluni annaasaqartiginerluniluunniit nalunaarutigiumanngikkaa, nunatsinni aalisartut ingerlatseqatigiiffimmit najuuffigineqanngillat, tamannalu ingerlatseqatigiiffimmut Namminersorlutik Oqartussanit pigineqartumut piumasaqaataagaluarpoq.