Naligiissitaaneq aamma angutinut tunngasuuvoq
Arnat angutillu akornanni naligiissitaaneq inuit eqqarsartaasiannut ikkuttariaqarpoq. Naligiissitaanissamut Siunnersuisoqatigiit siulittaasuat, Aviâja Lyberth Lennert, taamatut isumaqarpoq
Arnat angutillu naligiissitaanerat paasisariaqarpoq inuunermi pingaarutilinni tamani tamarmik assigiinnik pisussaaffeqarlutillu, pisinnaatitaaffeqarlutillu periarfissaqarnerattut. Tamanna Nunatsinni piviusuunngilluinnarpoq. Suliffeqarnermi assigiinngisitsisoqarpoq, arnat angutillu isumagisassaasigut suli qanganitsamik eqqarsartaaseqartoqarpoq, suiaassuseq tunngavigalugu persuttaasarnernik ajornartorsiutit suli annertoqaat, naligiissitaanissamullu inatsit nutartertariaqarpoq.
Kalaallit Nunaanni Naligiissitaanissamut Siunnersuisoqatigiit seleqataarusupput naligiissitaanissamik suliniutit taamaallaat arnat inuiaqatigiinni inissisimanerisa allanngortinnissaannik siunertaqarnerannik isummmersortarnerit allanngortinnissaannut. Naligiissitaanermi arnat kisimik pineqanngillat, taamatuttaaq pingaartigipput angutit, taakkulu periarfissaat pisinnaatitaaffiilu. Meerartatta malugisimasariaqarpaat namminneerlutik qinersisinnaanertik, tassani pineqarpata sunngiffimmi soqutigisat, ilinniarneq inuussutissarsiutissarluunniit. Suiaassuseq killiliissanngilaq taakku ineriartornissaannut qinerumaagaannulluunniit.
Naligiissitaanissamut Siunnersuisoqatigiit ukiuni tulliuttuni sisamani sulissutiginiarpaat naligiissitaanissap iluani suliniutit assigiinngitsut, pingaartumik inuussutissarsiornerup, ilinniartitaanerup inatsisiliornerullu iluanni.
Naligiissitaanissamut Siunnersuisoqatigiit pingaartillugu anguniagaraat naligiissitaanissamut ambassadørinik, siunnersuisoqatigiit siulitta pilersitaannik, suleqateqarnerup sakkortusarnissaa, kiisalu kalaallit NGO-inik suleqateqarluarnerup attatiinnarnissaa, Naligiissitaanissamut Siunnersuisoqatigiinni siulittaasoq taamatut nalunaaruteqarpoq.