Nalinginnaanngitsumik suleqatigiinneq: Nuuk Imermi sulisut sulilersinniarlugit KAIR sulissuteqarpoq
Nuuk Imeq matuppat, Kalaallit Airports aamma Mittarfeqarfiillu maqiterivimmi sulisut Nuummi mittarfissuassami sulilersinnaanerannik misissuipput.
2024-ip naanerani Nuummi mittarfissuassap ammarnissaa naatsorsuutigineqarpoq. Akerlianik ukiup aallartinnerani maqiterivik Nuuk Imeq matusussaasoq, suliffeqarfimmi piginnittut ilisimatitsissutiginikuuaat.
Pisut taakku marluk imminnut attuumassuteqanngikkaluarput, kisianni suleqatigiinnermi nalinginnaanngitsumi attuumassuteqalersinneqarput.
Nuuk Imermi sulisut 50-t missaanniittut ukiumit nutaamit suliffeeruttussaagaluartut, Kalaallit Airportsip sulisorilersinnaaneranut periarfissanik misissuiffigigai, ingerlatseqatigiiffik ilisimatitsivoq.
- Ammartussanngortumik mittarfittaartussaavugut, tassanilu amerlanerusunik sulisoqarnissarput pisariaqartipparput. Taamaattumik illuatungeriinnut tamaginnut iluaqutaasinnaasussanik periarfissaqartoq takusinnaavarput. Nuuk Imeq-mi sulisut teknikkinik ingerlasussanillu piareersaanermik aaqqissugaasumik sulineq sungiusimavaat, tamannalu mittarfimmi suliassanut naapertuulluartorujussuuvoq, Jens Lauridsen, Kalaallit Airportimi pisortaaneq oqarpoq, nangillunilu:
Sulisut ataatsimeeqatigigaat
- Uagut tungitsinniit suliffeqarfimmi Kalaallit Nunaata siunissaanut qitiusumik pingaaruteqartumi atorfininnissaq neqeroorutigisinnaavarput. Tamanna Nuuk Imeq-mi sulisut amerlasuut soqutigissagaat neriuutigaara.
(Assip ataani allaaserisaq nanginneqarpoq)
Mittarfeqarfinni aamma Kalaallit Airportsimi sulisut aqutsisut sapaatip akunnerini makkunani Nuuk Imermi sulisunik ataatsimeeqateqartut, KAIR oqaluttuarpoq.
Nuuk Imermi pisortaanerup Bernhard Christensenip suleqatigiinneq nuannaarutigaa, tamanna Nuuk Imermi sulisut siunissami suliffeqarnissaannut qulakkeerinneqataallunilu matuneqarnissaata tungaanut sulisunik attassisinnaassaaq:
- Tunisassiornitta ingerlanerani uagutsinniiginnarnissaq suleqatigiinnerup orniginartunngortittussaavaa. Peqatigisaanik suliffeqarfimmi pissanganartumi pitsaasunik orniginartunillu ineriartornissamut periarfissaqartumi, siunissami sulilernissamut sulisut arlallit periarfissanik ammaanneqarput, Bernhard Christensen oqarpoq.
Pikkorissarlutillu sillimaniarnermut akuerineqassasut
Mittarfissaq 2024-p naalernerani tamakkiisumik atulissasoq naatsorsuutigineqarpoq, mittarfiullu illutaa upernaakkut 2024-mi ammassaaq.
Ammarnissaa sioqqullugu sulisunngortussat isumannaallisaanermut akuersissuteqarfigineqartussaapput, arlalinnik pikkorissartussaallutik aammalu suliassat suliarineqarneranni ingerlaavartumik akuusussaallutik, KAIR taama allappoq:
- Mittarfimmi sulisussanut allanut pisariaqartitatsinnut siusinnerpaamik isumaqatigiissuteqarsinnaagutta, pisussat siunissami suliassaminnik suliarinninnissamut piareersimalersitsisussat sukkanerusumik aallartissinnaalertussaavagut. Tassani uagut aammalu Nuuk Imeq-mi sulisut amerlasuut piumasaqaatitta naatsorsuutigisattalu immitsinnut tulluartuusinnaanissaat upperaara neriuutigalugulu, Jens Lauridsen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...