Nalunaarutaagallartoq: Avammut tunisat apparialaarput

Naatsorsueqqissaartarfiup 2023-mi aalisakkanik avammut tunisineq pillugu naatsorsuutini siullerni kisitsisit saqqummiuppai.

Kisitsisit naatsorsuutaagallartut naapertorlugit 5,3 milliardit koruunip nalinganut avammut tunisisoqarsimavoq:

- 2023-mi januaarimiit decembarimut avammut tunisat nalingi katillugit 5.301 mio. kr.-usimapput. Ukiup siulianut sanilliullugit 95 mio. kr.-nik annikinnerupput, annikilleriarnerlu katillugu 1,8 pct.-iuvoq. Eqqaamaneqassaarli kisitsisit utaqqiisaagallaq naatsorsuinerummata taamaattumillu kingusinnerusukkut iluarsiiffigineqarsinnaallutik paasissutissat tamakkiinerusut pigineqalerpata, Naatsorsueqqissaartarfik allappoq.

Uumasut pingaarnerit pillugit naatsorsueqqissaartarfimmit kisitsisitigut paasissutissat ukuupput:

• Raajat - januaarimiit-decembarimut 2023-mi avammut tunisaanerisa nalingat 0,8 pct.-imik annertuseriarsimavoq, tamanna 21 mio. kr.-nik naleqarpoq. Avammut tunisat annertussusaat 5,6 pct.-imik annikilleriarsimasoq akillu 6,7 pct.-inik qaffallutik.
• Qalerallit - avammut tunineqartut nalingat 2,0 pct.-imik annertuseriarsimavoq, tunineqartut annertussusaat 6,0 pct.-imik annertuseriarsimasoq. Taamaalilluni kiilumut akit 3,7 pct.-inik appariarsimapput.
• Saarulliit - avammut tunineqartut nalingat 5,2 pct.-imik appariarpoq, tunineqartut annertussusaat 6,4 pct.-imik annertuseriarsimallutik. Saarulliit avammut tunineqartut kiilumut akia 10,9 pct.-imik appariarpoq.
• Saattuat - avammut tunineqartut nalingat 47,7 pct.-imik annikilleriarsimavoq, tunineqartut annertussusaat 8,6 pct.-inik apparpoq. Kiilumut akia 42,8 pct.-inik annikilleriarsimalluni.
• Nipisap suai - avammut tunineqartut nalingat 41,9 pct.-imik annertuseriarsimavoq, tunineqartut annertussusaat 50,7 pct.-inik qaffappoq. Kiilumut akia 5,9 pct.-inik annikilleriarsimalluni.