Nammineerluni nalunaarsuiffik immersortariaqalerpoq: Akileraarutikka ajoquteqarsinnaavoq
Qaammat una nammineerluni nalunaarsuiffik immersorneqarsinnaalerpoq, taamaasilluni nammineerluni nalunaarsuiffinni paasissutissat 2021-imut tunngasut eqqortuunersut misissorsinnaallugit. Akileraaruteqarnermut Aqutsisoqarfiup erseqqissaatigaa Akileraarutikka Sullissivik.gl-imiittoq ajoquteqarsinnaammat, qarasaasiatigut sillimaniarneq eqqarsaatigalugu iluarsaasisoqarmat.
Nammineerluni nalunaarsuiffik maanna elektroniskiusumik e-Boksikkut aamma allakkatigut nassiunneqarpoq.
Qitiusumik allaffissuaqarfiup qarasaasiatigut serveriisa ilaat unioqqutitsilluni iserfigineqarsimanerata kingunerisaanik nammineerluni nalunaarsuiffiit naqiteriikkat nassiussuunneqarneri ullunik marlussunnik kinguaattoorfiupput. Taama Akileraartarnermut Aqutsisoqarfik paasissutissiivoq.
- Akileraartarnermut Aqutsisoqarfiup qarasaasiatigut serveriisa sillimaniarneq eqqarsaatigalugu nutarterneqarnera pissutigalugu Akileraarutikka Sullissivik.gl-imiittoq ulluni tulliuttuni atorunnaarallartarsinnaanera naatsorsuutigissavat, Akileraartarnermut Aqutsisoqarfik allappoq.
Nammineerluni nalunaarsuiffik naqqiissutitalik kingusinnerpaamik maajip aallaqqaataani 2022-mi nassiunneqassaaq. Suliffeqarfiillu namminersortut piffissami tassani nassiusisariaqanngillat, taakkumi aatsaat maajip 15-ani naqqiussassaqarunik Sullissivik.gl aqqutigalugu nassiussisinnaapput.
Eqqumaffigikkit
Innuttaasut amerlasuut soraarnerussutisiaqarnissamut aaqqissuussinerit nunani allaniittut ilaat pillugit nammineerluni nalunaarsuiffissamik 2021-mut tunngasumik aammattaaq nassinneqarput.
- Innuttaasut soraarnerussutisiaqarnissamut aaqqissuussinernut inuunermullu sillimmasiissutinut Danmarkimiit imaluunniit nunani allaniittunut aningaasaliissutinnit iluanaarutitit nalunaarsuinermi nalunaarsugassaraatit. Soraarnerussutisiaqarnissamut aaqqissuisut nunani allaniittut toqqaannartumik Akileraartarnermut Aqutsisoqarfimmut nalunaaruteqarneq ajormata. Akileraarnermut Aqutsisoqarfik allappoq.
Innuttaasut nunatsinni soraarnerussutisiaqarnissamut aaqqissuussanik SISA-mi, Grønlandsbankenimi imaluunniit BankNordik Nuummiittumi peqartut iliuuseqassanngillat. Taakunannga Akileraartarnermut Aqutsisoqarfik toqqaannartumik nalunaarutisarmat.
e-Boksikkut allagarsisalerneq
Akileraartarnermut Aqutsisoqarfiup ilaatigut erseqqissaatigaat kikkut tamarmik 15-ileereersimasut e-Boksikkut allagarsisalernissaminnut pisussaaggeqarmata. Taamaammallu Sullissivik.gl aqqutigalugu digitalimik allagarsisarnerit eqqumaffigisassaasoq.
- e-Boksimi allagarsigaangavit e-boksit sms-ikkut imaluunniit e-mailitigut kalerrisussanngorlugu iluarsisinnaavat. Innuttaasut 1950-i sioqqullugu inuusimasut allallu allakkanik digitaliusunik pisartagartussaanngitsut Akileraartarnermut Aqutsisoqarfimmiit allakkerivikkut suli allagarsisassapput. Taama Akileraartarnermut Aqutsisoqarfik paasissutissiivoq.