Namminersorlutik Oqartussat annaasatsinnik taarsiisariaqarput

- Illoqarfimmi kommunimiluunniit innuttaasut ikiliartornerat kimulluunniit soorunami nuanniitsuuvoq. Sulisorpassuit Kangerlussuarmit nuuppata innuttaasut malunnaatilimmik ikilissapput, tamannalu Kangerlussuarmi innuttaasunut alianarlunilu artornartuuvoq, borgmester Malik Berthelsen (S) oqarpoq. Air Greenlandimi sulisut 26-t mittarfiit nutaat atulerpata Nuummut Ilulissanullu nuussasut paasissutissiissutigineqareertorlu taanna taama oqaaseqarpoq.

Sulisut 26-t nuuttussat ilaasa ilaquttatik ilagalugit Nuummut Ilulissanullu nuussapput.

- Suli ilisimanngilarput ilaqutariit qassit nuukkumaarnersut, tamannali meeqqat inuusuttullu meeqqerivinnut atuarfiannullu paaqqutarineqartut amerlassusaannut sunniuteqassaaq, Malik Berthelsen oqarpoq.

Inummut ataatsimut isertitaqarnerpaaffiusoq

Kangerlussuarmi innuttaasut Naatsorsueqqissaartarfiup kisitsisaatai aallaavigalugit agguaqatigiissillugu 356.000 koruuninik isertitaqartarput, tamannalu agguaqatigiissillugu nunatsinni illoqarfiit nunaqarfiillu amerlanersaannit qaffasinneruvoq.

- Kangerlussuaq nunaqarfiuvoq suliffissuaqarfiusoq, nunaqarfinnut allanut sanilliullugu agguaqatigiissillugu inummut ataatsimut isertitaqarnerpaaffiusoq. Tamanna isumaqarpoq kommuni akileraarutitigut isertitanik annaasaqassasoq. Aappaagumut missingersuutit suliarinissaat uagutsinnut nuannerpallaassagunanngilaq, borgmester Malik Berthelsen oqarpoq.

Suliffissaat nutaat pisariaqartippavut

Kangerlussuaq Qeqqata Kommunianut pingaaruteqarpoq, tassani innuttaasut tamarmik suliffeqarput, nunaqarfiup aqutsisuini ilaasortat nunaqarfiup allanngornissaanik isumakuluuteqartut oqarput. - Suliffiit taama amerlatigisut nunaqarfimmit qimagutsinneqarpata suliffinnik nutaanik pisariaqartitsilissaagut, Johan Lange (IA) oqarpoq.

- Ingerlatsinermut aningaasartuutit appartinnagit akileraarutitigut isertitat annaassavagut. Taamaattumik annaasavut Namminersorlutik Oqartussat kommunit ataatsimut tapiissutaannik taarsiiffigisariaqarpaat – akileraarutitigut isertitat qanoq amerlatigisut annaajumaarnerivut suli kisitsisitigut oqaatigisinnaanngilakka, Malik Berthelsen oqarpoq.

Nunaqarfimmi suliffissat nutaat

- Albatros Arctic Circlep Hotel Kangerlussuarmik pisisimanera aamma Issittumi upalungaarsimanermut tunngaviusumik ilinniarfiup nutaap aallartinnissaa qujamasuutigaavut. Suliffiilli nutaat nunaqarfimmit nuuttunit annaasaqaataasut ukiuni siullerni matussusernavianngikkaat isumaqarpunga, Malik Berthelsen oqarpoq.

Kommunalbestyrelsi Kangerlussuarmi juunimi ataatsimiissaaq, tassungalu atatillugu nunaqarfiup siunissaa pillugu innuttaasunik ataatsimiisitsinissaq qaaqqusissutigineqassalluni.

- Siunissaq eqqarsaatigalugu Kangerlussuaq nunaqarfittut ukioq kaajallallugu suliassaqarfiussaaq. Misigisaqartitsilluni takornariartitsisarneq aallaavigalugu Kangerlussuup Sisimiullu akornanni ineriartornissamut periarfissaqarluarpoq, Malik Berthelsen oqarpoq.