Namminersorlutik Oqartussat isumaqatigiissutaat timersortartut iluarinngilaat
Kalaallit Nunaanni Timersoqatigiit Kattuffiata ersissutigaa Air Greenlandip sipaarniarneratigut timersortartunut billetsit akikitsut eqqorneqassasut
Namminersorlutik Oqartussat Air Icelandimik atuinialernerat Kalaallit Nunaanni Timersoqatigiit Kattuffiata erloqinartittorujussuuvaa, kattuffiup siulittaasua Nuka Kleemann tusagassiorfinnut nalunaarummi allappoq.
Kattuffiup ersissutigaa Air Greenlandip GIF-imik aningaasaliisutut isumaqatigiissutini atorunnaarsittariaqassagaa. Isumaqatigiissut taanna atorlugu Kalaallit Nunaanni tamarmi timersortartut akikitsuararsuarmik timmisartorsinnaapput.
Air Iceland nunat allamiut selskaberaat Kalalalit Nunaannut akileraarutitigut isertitsiffiunngitsoq, assersuutigalugulu aningaasaliinerit aqqutigalugit inuiaqatigiinnik tapersersuinngitsoq, aamma illoqarfinni timmisartuussiffimmini, taanna tikkuaavoq.
- Air Greenland nalunaarsimavoq pissutsit kingunerisaannik aningaasartuutini qimerloortariaqarlugit, aamma aningaasaliisutut aningaasartuutit. Kalaallit Nunaanni Timersoqatigiit Kattuffiata Air Greenlandip nalunaaruteqarnera paasisinnaalluarpaa, ajornartorsiulerneq tunuliaqutaralugu taamatut nalunaaruteqarmat, Nuka Kleemann oqarpoq.
Taassuma oqaatigaa timersoqatigiit kattuffiata Air Greenland aningaasaliisutut isumaqatigiissuteqargisimagaa, taannalu malillugu GIF kattuffiillu ilaasortai, tassa nuna tamakkerlugu klubbini timersortartut, billetsinik akikillisanik atorlutik angalasinnaapput.
- Billetsit tamakkua klubbit nunap immikkoortuini nunamilu tamarmi timersuutini tamani, soorlu arsaannermi, assammik arsarnermi, badmintonermi il.il., pissartanngorniunnerni peqataasinnaanerannut aalajangiisuupput, Nuka Kleemann tikkuaavoq.
- Billetsit akikillisat aamma nunatsinni avataanilu sungiusaqatigiinnissamik periarfissiipput aammalu nunani tamalaani pissartanngorniunnerni peqataanissamut periarfissiillutik. Aningaasaliissutit appartinneqarpata atorunnaarsinneqarpataluunniit kalaallit timersortartut sakkortuumik eqqorneqassapput.
Taamaattumik Kalaallit Nunaanni Timersoqatigiit Kattuffiata nunatsinni oqartussaasut kaammattorpai sapinngisamik Air Greenland atortaqqullugu, tamanna inuiaqatigiinnut timersortartunullu pitsaanersaammat, Nuka Kleemann tusagassiorfinnut allakkamini allappoq.