Namminersorlutik Oqartussat suliffeqarfiutaani tunisat ikiliartornerat unammillernartoq
Great Greenlandip 2023-mi naatsorsuutaani takuneqarsinnaavoq 2023-mi 500.000 koruunit missaannik sinneqartoortoqartoq, tamannalu Namminersorlutik Oqartussanit tapiissutinik amerlisitsinermik pissuteqarpoq.
Great Greenland tamarmik tunisassiornermi ikileriarsimapput, kisianni nunanit allaneersunik tunisassiornermi kisimi pisoq.
Ole G. Jensen
Namminersorlutik Oqartussat suliffeqarfiutaat Great Greenland 2023-mi ingerlanerliorpoq, tamanna suliffeqarfiup ukiumoortumik naatsorsuutaani tamanut saqqummiunneqaqqammersuni takuneqarsinnaavoq.
Siulersuisut
Ataatsimeersuarnermi siulersuisut ukiunut suli ataatsimut toqqarneqarput:
Juliane Anike Frederikke Martha Henningsen Heilmann (siulittaasoq)
Niels Eli Boassen
Louise Grace Lynge Berthelsen
Freddy Goske Christensen
Ulunnguaq Markussen
Kaaviiaartitat 2022-mi 18 mio. koruunit 2023-mi 14,2 mio. koruuninut appariarput (tabel takuuk), ukiumullu angusat 2022-mi 2,8 mio. koruunit 2023-mi 0,5 mio. koruuninut appariarput.
Tunisassiat puisillu amiinik tunisat appariartornerat pissutaallutik ingerlatseqatigiiffiup angusaasa appariarsimanerat aqutsisut nalunaarutaanni allassimavoq. Namminersorlutik Oqartussat 3,7 millionit koruuninik tapiissuteqaqqinnerannit amigartoorutit annikinnerupput.
Great Greenland ukiumoortumik naatsorsuutai 2023
- Nioqqutissat tamarmik appariartut malugineqassaaq, nunani tamalaani nioqqutissat naammassisat aamma Kalaallit Nunaanni ammit tunisat 2022-mut naleqqiullugit amerlaqatigigajalluinnarpaat, aqutsisut nalunaarusiaanni allassimavoq.
Piniartut amerlanerusut ukioq manna aalisarnerusimasut, aalisakkallu tunitsivinni akii ukiuni kingullerni qaffakkiartorsimapput. Amernik tunisinerup appariartorneranut tamanna pissutaasimassasoq aqutsisut nalunaarusiaani nangilluni allassimavoq.
2023-mi ammit katillugit 26.076-it tunineqarput, tassa ukiup siulianut sanilliullugu 4.000-ingajannik ikinnerullutik.
- Isorliunerusuni ukiuuneq silallu pissusaa puisinniarnermik ajornakusoortitsisarput, Great Greenland aamma allappoq.
Great Greenland 2023-mi katillugit 27 millionit koruuninik tapiiffigineqarpoq. Aningaasat amernik tunisinermi, tunitsivinnik ingerlatsinermi Qaqortumilu sullissivimmik ingerlatsinermi atorneqartussatut immikkoortinneqarput.
2024-mi amigartooruteqarnissaq missingersuutigineqarpoq
Amernik pilersuinerup annikilliartornera piffissap ingerlanerani suliffeqarfiup tunisassiorneranut navianartorsiortitsissaaq, nalilerneqarpoq.
2024-mut tunngatillugu Great Greenlandip ukioq pissangalluni qilanaaraa, takornariartitsisartummi nalunaarmata umiarsuarpassuit takornariartaatit Kalaallit Nunaannut tikikkumaartut. Nuummi mittarfik nutaaq aamma atulertussaavoq.
Ingerlatseqatigiiffiup 12,7 millionit koruuninik kaaviiaartitaqarnissani 2,5 millionit koruuninillu amigartooruteqarnissani missingersuutigai.
Great Greenland A/S amernik tunitsivinnik 34-nik piniartunit puisit amiinik tunitsivigineqarsinnaasunik peqarpoq.
