Namminersorlutik Oqartussat tuniniaapput: Hotel Kangerlussuaq pigilersinnaavat
Hotel Kangerlussuup maanna tuniniarneqalernera taamaalillunilu tuniniaaneq pilersaarutit malillugit ingerlassappat namminersortunngortinneqalernera, borgmesterip Malik Berthelsen (S) naammagisimaarpaa.
Akunnittarfimmik piginnittunngorniarlutit takorluugaqarpit?
Taamaappat Kangerlussuarmi maanna periarfissaqarpoq. Hotel Kangerlussuaq, Mittarfeqarfinnit pigineqarluni ingerlanneqartoq maanna tuniniarneqalerpoq.
Naalakkersuisut pisisussaq eqqortoq akimut naleqquttumut nassaarissappassuk, akunnittarfik namminersortunngussaaq.
Qeqqata Kommunianilu borgmesterip tamanna naammagisimaarpaa:
- Hotel Kangerlussuup namminersortunngortinneqarnissaanik Naalakkersuisunut kissaateqarnerput saqqummiunnikuuarput. Illoqarfiit allat mittarfiliorfiusut assigalugit Kangerlussuup ineriartornissaanut tamatuma qulakkiissavaa. Tassami akunnittarfiup akunnittarfinnik nerinartarfinnillu suliassaqarfinnik ilisimasaqartunut neqeroortunut tuniniarneqarneratigut, periarfissanik asseqanngitsunik ineriartortitsisoqarsinnaanera qularinngilarput, Malik Berthelsen nuannaarluni Sermitsiaq.AG-mut oqarpoq.
Akunnittarfik pitsaasunit tiguneqassasoq neriuutigigaa
Borgmesterip takornariartitsinikkut suliniutinut periarfissanik pitsaasoqarnerarpaa. Naalakkersuisut pisisussamik arlalinnilluunniit takornariartitsinermik ineriartortitserusuttunik nassaassasoq, taanna neriuuteqarpoq:
- Akunnittarfimmut neqerooruteqartussaq aamma takornariartitsinermut aamma neriniartarfinnik ingerlatsinermik ilisimasaqassasoq neriuutigilluinnarpara. Taamaaliortoqarsinnaassappat akunnittarfiup iluarsartuunneqarlunilu nutarterneqarnissaanut ammaassisoqassaaq, taamaattoqarpallu siunissami Kangerlussuarmut takornariartartut amerlanerulernissaat qularinngilara, borgmesteri oqarpoq.
Qeqqata Kommuniata Kangerlussuup Sisimiullu akornanni ukiorpassuarni ATV-nut aqquteqalernissaat suliniutigaa, maannalu piffissaq apeqqutaaginnalerpasippoq.
Angalasut aqqusaartartut imaluunniit tikittartut qanoq amerlatigissanersut suli ilisimaneqanngilaq, tassami Nuummi Ilulissanilu mittarfiit nutaat ammarpata, timmisartortitseqatigiiffinnik Atlantikoq qulaallugu imaluunniit Amerikamut Avannarlermut Kangerlussuarmiit timmisartuussisarnissamut piareersimasoqanngimmat.
5.357 kvm-t pisinermut ilaasut
Tuniniaanermut allagartami atuarneqarsinnaavoq:
- Akunnittarfik annerpaamik neqeroortumut tuniniarneqarpoq, aamma neqerooruteqarnissamut piffissaliisoqanngilaq, pisinissamut neqeroorutit ataavartumik nalilersorneqassapput/suliarineqassapput, Naalakkersuisullu neqeroorutinut tamanut itigartitsisinnaapput.
Illorsuarmi avataanut attartugassaqarpoq (allaffiit, toqqorsiviit aamma pisiniarfik) taakku katillugit 5.357 kvm-t missaannik angissuseqarput.
Tuniniaanermi allagartami Netbolig-mit saqqummiunneqartumi, akunnittarfik qanoq akeqarsinnaanersoq imaluunniit pisiarinnikkumalluni qaqugu neqeroortoqarsinnaanersoq allaqqasoqanngilaq, taamaammat sapaatip-akunnerani uani aningaasanik kaasarfimmioqarpallaaraanni iluatsitseriartoqarsinnaavoq.
Hotel Kangerlussuup tuniniarneqarnera pillugu UANI atuarnerusinnaavutit.