Namminersornerusut GTE tatigaat
Namminersornerullutik Oqartussat Atassummut akissutaanni allassimavoq GTE-mi eqqissisimannginneq Siunnersuisoqatigiinni inuussutissarsiuteqarnermut immikkoortup nuunneqarnissaa nalornissutaasimagunartoq.
Qanittukkut GTE-mi inuussutissarsiutinut immikkoortup GTE-mit immaqa peerneqarnissaa taarsiullugulu Namminersornerullutik Oqartussat suliffeqarfiutaannut Greeland Venturemut inissinneqarnissaa pillugu nalunaarutit kingorna Atassutip Inatsisartuni arlalinnik apeqqutilliissuteqarnerata kingorna oqaaseqaat akissutitut tunniunneqarpoq.
Tassunga tunngatillugu Namminersornerullutik Oqartussanit oqaatigineqarpoq, inuussutissarsiutinik siuarsaarniarluni suliniutit nunatsinni inuussutissarsiuteqarnermut pingaaruteqartorujussuusut, taamaattumillu siunissami inuussutissarsiutinik siuarsaanissanut naliliisarneq arlaannaanulluunniit attuumassuteqanngitsunit ingerlanneqartarnissaa kissaatigineqartoq. Tamaalilluni siunissami inuussutissarsiutinik siunnersuisarneq ataatsimut isigalugu pitsanngorsarneqarsinnaalissaaq. Tamanna pissutigalugu naliliisarnermik suliaqartarnermut siunnersorti avataaneersoq atorfinitsinneqarsimavoq.
Namminersornerullutik Oqartussat Atassummut akissutiminni nangillugu oqaatigaat, GTE-mi eqqissimannginneq Siunnersuisoqatigiinni inuussutissarsiutinut immikkoortumi nalornissuteqalernermik kinguneqassagunartoq. Aasaanerata qaangiunnerata missaani naliliinerit aallartinneqarsimasut naammassineqassasut naatsorsuutigineqartoq Travel People allappoq.