Ikissut tassaavoq inniminniinermut atortorissaarut nutaaq Arctic Umiaq Linep siorna septembarimi atulersitaa. Angalasut Sarfaq Ittuup tikittanngisaanut ingerlaqqinniartut inniminniivigisinnaasaat.
– Ilaasut Upernavimmut imaluunniit Uummannap eqqaani nunaqarfinnut Ikerasammut, Saattunut Ukkusissanut angalarusuttut Sarfaq Ittummik Uummannamut tikinnerminni ingerlariaqqinnissaminnik inniminniisinnaanngorput. Arctic Umiaq Linep inniminniinermut quppernerani tamanna periarfissanngorpoq, Arctic Umiaq Linemi ineriartortitsinermut pisortaq Mads Hyldahl Mathiassen oqarpoq.
Ikissut tassaavoq inniminniinermut atortorissaarut nutaaq Arctic Umiaq Linep siorna septembarimi atulersitaa. Angalasut Sarfaq Ittuup tikittanngisaanut ingerlaqqinniartut inniminniivigisinnaasaat.
– Ilaasut Upernavimmut imaluunniit Uummannap eqqaani nunaqarfinnut Ikerasammut, Saattunut Ukkusissanut angalarusuttut Sarfaq Ittummik Uummannamut tikinnerminni ingerlariaqqinnissaminnik inniminniisinnaanngorput. Arctic Umiaq Linep inniminniinermut quppernerani tamanna periarfissanngorpoq, Arctic Umiaq Linemi ineriartortitsinermut pisortaq Mads Hyldahl Mathiassen oqarpoq.
Misileraalluni suliniut
Sarfaq Ittuk ullut 14-ikkaarlugit Uummannamut tikittassaaq, Nanunnguarlu oktobarip tungaanut ataasinngornikkut Ilulissaniit Uummannamut aqqusaarluni Upernavimmukartassaaq. Marlunngornikkullu Upernavimmiit Uummannamut nunaqarfinnullu pingasunut ilaasunik angallassisassaaq. Taakkulu book.aul.gl-imi inniminniiffigineqarsinnaapput.
– Arctic Umiaq Linep inniminniinermut atortuanut angalatitsisup allap ilanngunneqarnera aatsaat misilinneqarpoq, ineriartortitsinermut pisortaq oqarpoq. Naleraq Sea Safarip Targaa Nanunnguaq Arctic Umiaq Linep inniminniinermut atortuanut siullertut ilanngunneqarpoq, Sarfaq Ittuullu tikiunnissaanut pilersaarutinut naleqqussarneqarluni.
– Tamanna misiliutitut suliniutaasoq erseqqissassallugu pingaaruteqarpoq. Tamanna ajunnginnersoq paasiniarlugu misilipparput, tamatumalu kingorna sapinngisamik amerlanerpaat suleqatigissavavut, taamaalilluta sumiiffinni angallaffiunnginnerusuni aqqutinik pilersitsissalluta, Mads Hyldahl Mathiassen oqarpoq.
Avannamut angalanissamut inniminniigit
Arctic Umiaq Linep takornariaqarnermik ineriartortitsinissaq neriuutigalugu Sarfaq Ittuk Upernavimmut Nanortalimmullu siorna angallassisittalerpaa. Umiarsuaatileqatigiiffik Naleraq Sea Safarimik Avannaanut angalasarnissamik isumaqatigiissuteqartoq Arctic Umiaq Linemi pisortaasimasup Jens Jakob Sandgreenip soraarnissani sioqqullugu nalunaarutigaa. Nunap immikkoortuani angallassisartut Sarfak Ittummik suleqateqalernerisigut Kalaallit Nunaanni takornariaqarnermik ineriartortitsinissamut sunniuteqarsinnaammat.
– Avannaani Naleraq Sea Safari suleqatigaarput, Uummannap Upernaviullu akornanni, aamma Ukkusissani, Saattuni Ikerasammilu angallassisartutut. Taamaalillutik angalasut Uummannamut Sarfaq Ittummik tikeriarlutik angalanerup sinneranut atassuserneqarsinnaallutik, Mads Hyldahl Mathiassen oqarpoq.
Angallassisartut amerlanerusut atassusilerusukkaat
Naleraq Sea Safaris Nanunnguaq misiliutitut suleqatigigaluarlugu angallassisartut allat aamma inniminniisarfimmut ilanngussinnaanissaat Arctic Umiaq Linep neriuutigaa.
– Kujataani nunaqarfinnut tulluarsinnaavoq, sumiiffinnili angallavigineqarpianngitsuni tamanut ammavugut. Tassa arlaata najugaqarfiisa ilaanni aqqummik attaveqaateqarsinnaanera pillugu, ingerlatitseqqiinissamut periarfissaqalerutta taakku ilanngutissavavut. Inniminniinermi atortorissaarutitsinni, Ikissummi, suli suliassarpassuaqarpoq, taakkulu iluarsineqarlutillu naleqqussarneqareerpata annertusiinissatsinnut piareeqqavugut, Mads Hyldahl Mathiassen oqarpoq.
– Sumiiffinni angallassisut angalanissamut pilersaarutitik akiutitillu nammineq aalajangertarlugit inuit Ikissut atorlugu najugaqarfimminnit ornigassaminnut inniminniisinnaanngorlugit, Mads Hyldahl Mathiassen oqarpoq.
Nanunnguaq atorlugu angalasup Naleraq Sea Safarip atugassarititai malinneqartut eqqumaffigissagaa aamma nassuiaatigaa, soorluttaaq Naleraq Sea Safari billitsimut angalanermut tamarmut akisussaasuusoq.
Inniminniisarfik Ikissut
Nunaqavissut takornariallu billetsinik Sarfaq Ittummilu inissanik pisariitsumik pisisinnaanngorlugit Arctic Umiaq Linep, ineriartortitsisut suleqatigalugit, ukiumi ataatsimi inniminniinermut systemi nutaaq Ikissut suliarisimavaa.
– Atortorissaarutit eqaatsut atorlugit inniminniisarneq allatut ingerlassinnaanngorumallugu soqutiginnittut oqaloqatigisimavavut, taakkualu piffissami sivikitsumi piviusunngortitsisinnaasimammata tupigusuutigaarput, Mads Hyldahl Mathiassen oqarpoq.
– Nutaatut aamma inissat inniminniiffigineqarsinnaalerput. Aamma inniminniisarfik aqqutigalugu inissaq inniminnerneqarsimanersoq takuneqarsinnaavoq. Aamma angalanerit arlallit ataatsikkut pisiarineqarsinnaalerput. Tamakku tamarmik uagutsinnut nutaajupput, siornatigullu periarfissaqarfiginngisatsinnik periarfissiipput, Mads Hyldahl Mathiassen oqarpoq.
