Disko Linep
Kujataani ilaasunik angallassinermut kiffartuussinissamut isumaqatigiissutit
2030-p tungaanut atuuttut aalajangiusimaannaraluarai Qaqortumi mittarfissap
atulerneqarnissaa sioqqullugu Kujataani kiffartuussinissamut isumaqatigiissutit
nutarterneqarnissaat pillugu politikkikkut oqallinnissamut siunnersuut
saqqummiunneqassasoq Attaveqaqatigiinnermut Naalakkersuisoq Aqqaluaq B. Egede,
Inuit Ataqatigiit, nalunaarpoq.
Tamanna
najukkami inuussutissarsiortunut kiffartuussinissamik isumaqatigiissutit
ilaannut periarfissatsialaavoq, Minik Serano Frederiksen, takornarialerisoq
Kommune Kujallermilu kommunalbestyrelsimut ilaasortaq, taama isumaqarpoq.
Disko Linep
Kujataani ilaasunik angallassinermut kiffartuussinissamut isumaqatigiissutit
2030-p tungaanut atuuttut aalajangiusimaannaraluarai Qaqortumi mittarfissap
atulerneqarnissaa sioqqullugu Kujataani kiffartuussinissamut isumaqatigiissutit
nutarterneqarnissaat pillugu politikkikkut oqallinnissamut siunnersuut
saqqummiunneqassasoq Attaveqaqatigiinnermut Naalakkersuisoq Aqqaluaq B. Egede,
Inuit Ataqatigiit, nalunaarpoq.
Tamanna
najukkami inuussutissarsiortunut kiffartuussinissamik isumaqatigiissutit
ilaannut periarfissatsialaavoq, Minik Serano Frederiksen, takornarialerisoq
Kommune Kujallermilu kommunalbestyrelsimut ilaasortaq, taama isumaqarpoq.
Nalunaarutit
akerleriittut
Qaqortumi
mittarfissap ammarneqarnerata kingunerisaanik Kujataani ilaasunik
angallassinermut kiffartuussinissamut isumaqatigiissutit nutarterneqarnissaat
siunertaralugu suliaq aallartinneqartoq, tamannalu pillugu politikkikkut
oqallinnissamut siunnersuut saqqummiunneqassasoq Ineqarnermut,
Attaveqaqatigiinnermut Isorliunerusunullu Naalakkersuisoq, Aqqaluaq B. Egede
IA, paragraf 37 naapertorlugu Inatsisartunut ilaasortamut Anders Olsenimut,
Siumut, akissuteqarnermini ilisimatitsivoq. Tamatuma saniatigut kiffartuussinissamut isumaqatigiissutit
Kujataa minillugu ukiunik qulinik sivisussuseqartut Naalakkersuisut
nittartagaanni allassimavoq, taakku Qaqortumi mittarfissap ammarneqarneranut
atatillugu isumaqatiginninniutigineqaqqissapput.
Qeqertarsuup
Tunuani, Nunatta Qiterliani Kujataanilu maanna kiffartuussinissamut
isumaqatigiissut 2030-p naanissaata tungaanut atuuttoq, Noélle Simoud Disko
Line A/S-imi niuernermut pisortaasoq ilisimatitsivoq.
- Qaqortumi
mittarfissap atulerneraniit 31. decembari 2030 tikillugu angallannermut
pilersaarut nutaaq isumaqatigiissutigineqartoq atorneqassaaq, tassungalu
atatillugu tapiissutit isumaqatigiissutigineqartut nalimmassarneqassapput,
Noélle Simoud ilisimatitsivoq.
Disko Line
sumiiffinni tamani angallassisartoq, nunaqavissoq tikeraartorluunniit
immikkoortinneqanngitsoq, taassuma erseqqissarpaa.
- Tassunga
atatillugu angallassinissamut pilersaarutaareersut saniatigut attartortunik angallassisarpugut -
tassanittaarlu nunaqavissut tikeraartullu assigiinngisinneq ajorpagut.
Nunatsinnut tikeraartut angallatinik angallassisartullu angallannerit
assigiinngitsut akulikinnerulersikkaat isumaqarpugut.
- Angalasut
amerliartortillugit ullormut sapaatillu akunneranut angalanerit amerliartorput.
Najukkami innuttaasut eqaannerusumik angalasinnaapput - tamannalu angalasunut
ataasiakkaanut, napparsimasunut, niuertunut allanullu iluaqutaavoq.
- Disko
Linep angallassineq angallassinermit attartortumit pingaarnerutinngimmagu
erseqqissassallugu pingaaruteqarpoq, taanna naqissusiivoq.
Maliina Ittuk
Kujataanut tikikkuni Qaqortumi mittarfiliornerup naammassinissaata tungaanut
angallassissaaq. Tassani sapaatip akunneranut marloriarluni aalajangersimasumik
angallassissaaq, piffissallu sinnerani sila pissutigalugu
ajornartorsiuteqalersinnaasunut imaluunniit taamaatitsiinnarnissamut
kinguaattoornissamullu piareersimassaaq. Maliina Ittuk Disko Linep umiarsuaatut
sinneri assigalugit, angallassinngikkallarnermini nunaqavissunut
tikeraartunulluunniit attartorneqarsinnaasoq Noélle Simoud ilisimatitsivoq.
Suliaqarfik
ineriartortoq
Takornariartitsinermik
ingerlatsivik Serano Boat Tours 2021-mi pilersinneqartoq Minik Serano
Frederiksenimit pigineqarpoq. Suliffeqarfik alliartortoq Poca 770-imik
aqqaneq-marlunnik ilaasoqarsinnaasumik angallateqartoq qanittukkut assingusumik
angallateqalerpoq. Minik Serano Frederiksen, Kommune Kujallermi
kommunalbestyrelsimut ilaasortaq, naapertorlugu Kujataani
takornariartitsisarnermut siunissaq pitsaasuuvoq.
- Kujataani
takornariaqarneq ineriartorpoq, ingammik takornariartaatinik umiarsuaqartarnera
aasaanerani uagutsinnut
umiatsiaatilinnut allanullu ulapaarfiusarpoq.
- Ukioq
mannaannaq angallatitsinnut marlunnut 7000-it missaanniittut
inniminniisimapput, oktobarillu tungaanut ulapaarfiussaaq, taanna oqarpoq.
Taamaammat
Kujataani takornariartitsinerup annertusarneqarnissaanut aningaasatigut
tunngavissaqartoq, Serano Frederiksen isumaqarpoq.
Disko Line
navianartorsiortitsisoq
Nunaqavissut
iluaqutissaannut, tamatumalu saniatigut kiffartuussinissamut
isumaqatigiissutinik ingerlatsisut takornarialerinermi kiffartuussinernullu
allanut atatillugu namminersortut angallataannik unammillerneqannginnissaat
siunertaralugu kiffartuussinissamut isumaqatigiissutit nutarterneqarnissaat,
Naalakkersuisut maanna naalakkersuisoqatigiiusut angallannerup
aaqqissugaalluarnera nutaaq tunngavigalugu suleqatigiinnissamut
isumaqatigiissutaat naapertorlugu misissorneqassapput.
Minik Serano
Frederiksenip Maliina Ittuup 113-inik ilaasoqarsinnaasup Disko Linellu
umiarsuaataata sinnerata takornarianit attartorneqarsinnaanerat
periarfissaatillugu Disko Linep Kujataani takornarialerisunut
unammillersinnaanera ernummatigalugu politikkikkut siunnersuut tamanna
tapersersorpaa.
- Disko
Linep, Namminersorlutik Oqartussanik millionilikkaanik kiffartuussinissamut
isumaqatigiissuteqartup, angallaterpassuarnik ilaatigut takornarianut
attartortitsisinnaanerai taamaalillunilu takornarialerisunut mikisunut
unammillersinnaanera pissusissamisuunngilaq, taanna oqarpoq.
Unammilleqatigiinneq
naligiinngiffiussasoq tamannalu ingerlaannassappat, ajornerpaamik
pisoqassagaluarpat, takornarialerisut mikisut matusariaqarnissaat Minik Serano
Frederiksenip, Nanortalik Lodge ApS-imik pilersitseqataasup, ernumassutigaa.
Neqerooruteqarumasut
Qaqortumi
mittarfissap ammarnissaanut atatillugu Kujataani ilaasunik angallassinermut
kiffartuussinissamut isumaqatigiissutit neqerooruteqarfigineqaqqilernissaat
pillugu politikkikkut nalunaarut, Serano Boat Toursimik piginnittup
nuannaarutigaa.
Minik Serano
Frederiksen naapertorlugu Kujataani namminersortut amerliartuinnartut Qaqortumi
mittarfissap atulernissaa sioqqullugu siunissamut piareersalersimapput,
tamannalu pissappat ilaasunik angallassinermut kiffartuussinissamut
isumaqatigiissutinut nunaqavissut neqerooruteqartarnissaat pissusissamisoortoq
taanna isumaqarpoq.
