Narsami toqoraavik nutaaq
40 million koruunit atorlugit aningaasaliineq Neqi'p siunissaa qulakkeerpaa aamma ukioq naallugu suliffissanik pilersitsissaaq
KNI'mi siulersuisut decembarip arfineq-aappaanni ataatsimiinneranni aalajangiunneqarpoq Narsami toqoraavik 40 million koruuninik aningaasaliffigineqassasoq, KNI tusagassiivinnut allappoq.
- Kiisami kujataani toqoraavik Neqi siunissamut qaamanermut nikeriaqqissinnaalissaaq. Uumasuusiviliortoqarlunilu toqoraavimmik nutaamik sanasoqassaaq. Taassuma saniatigut tunisassiornermi atortut tamarmik nutarterneqassapput, pitsaanerusumik ingerlatsinermik minnerunngitsumillu tunisassianik ineriartortitseqqinnermik maannamut ilisimaneqartunit pitsaanerusumik, KNI allappoq.
- Ukiuni arlaqartuni toqoraaviup pisoqalisup ukiakkut toqoraavittut atorneqarnissaanut akuersissummik pinissaq anguniarlugu millionerpassuit atorlugit iluarsaassineeqqat ingerlanneqartarput. Maannakkut tunisassiorfimmik ullumikkut piumasaqaatinik naammassinnissinnaasoq pilersinneqassaaq, KNI paasissutissiivoq.
Piffissaq ungasinnerusoq eqqarsaatigalugu toqoraavittaassaq ukioq naallugu arlalinnut suliffissaqartitsissaaq. Aamma illoqarfimmiittoq nerisassiornermik ilinniarfik Inuili qanimut suleqatigalugu ilinniartoqarsinnaassaaq.
- Ukiorpassuarni kissaatigineqarsimasoq kiisami piviusunngussaaq, Neqi'p pisortaanera Lars Møller-Sørensen aamma KNI A/S'imi Neqimik piginnittumi pisortaanerugallarpoq.
- Qangalili pisariaqartitsineq nalunngilarput politikkikkulli aalajangiisoqarnissaa utaqqinikuuarput, taakkulu maannakkut inissipput. Qutsatigeqaarput siulersuisuttalu aningaasaliinissaq aalajangiummassuk sulineq aallartissinnaanngorpoq, Lars Møller-Sørensen oqarpoq.
- Qularutissaanngikkunarpoq tunisassiorfik Neqi Kujataani uumasuuteqarnermik aamma inuussutissarsiornermut pingaaruteqartorujussuussasoq. Tamatuma saniatigut nunap immikkoortortaani tassani sanaartornermik suliallit suliassaqarnerulissasut, Lars Møller-Sørensen oqarpoq.
- Narsami toqoraavik Kujataani nerisassanik tunisassiornerup ineriartorteqqinnissaanut pingaaruteqarluinnarpoq. Atortut ullutsinnut naleqqussakkat atorlugit Neqi siunissami uumasuuteqarnermik inuussutissarsiornerup qaffassarneqarnissaanut pinngitsoorneqarsinnaanngilaq, KNI A/S'imi pisortaanerugallartoq oqarpoq.