Nathanielsen isumaqatigiissitsiniarnissaq pillugu: ETM-ip piumasaqaatinik atuuttunik akuersissutiginnikkumannginnera uggornarpoq
Aatsitassanut Naalakkersuisoq, Naaja Nathanielsen (IA), uppernarsaavoq, isumaqatigiissitsiniarnissamik suliami Naalakkersuisut Energy Transition Mineralsimit (ETM) naammagittaalliuummik tigusaqarsimasut. Taanna suli isumaqarpoq, aatsitassarsioqatigiiffik suliamik pilersitsinissamut tunngavissaqanngitsoq.
Aatsitassanut, Aningaasaqarnermut, Naligiissitaanermut Inatsisillu Atuutsinneqarnerannut Naalakkersuisoq, Naaja Nathanielsen (IA), ETM-ip isumaqatigiissitsiniarnermik suliamut naammagittaalliutiminik tunniussaqarsimaneranik tupaallaatiginninngilaq. Taanna isumaqarpoq, naammagittaalliuut suliamik allanngortitsinavianngitsoq:
- Takkukkumaarnera ilimagineqareersimavoq, aamma isorinnittuunissaa ilimagineqareersimavoq. Naammagittaalliuutip sukumiisumik atuarnissaanut suli periarfissaqarsimanngilagut, kisianni siullermeerlugu atuarnerata kingorna uannut uissuumminartortoqanngilaq, imaluunniit uanga isumaga malillugu suliamik allanngortitsisortoqanngilaq.
Naalakkersuisoq aamma oqarpoq, taarsiivigeqqussutit 76 milliarder koruunit Naalakkersuisunit pimoorunneqartariaqartutut isigineqanngitsut, isumaqatigiissitsiniarnermilu eqqartuussiviup suliami aalajangiinissamut piginnaassuseqannginneranik isumaq aalajangiusimaneqartoq.
- Naalakkersuisut aningaasat taaneqartut isumassaqartinngilluinnarpaat. Siullertut isumaqarpugut, isumaqatigiissitsiniarnermi eqqartuussivik suliami aalajangiinissamut piginnaassuseqanngitsoq, aappaattullu isumaqarpugut, inatsit taarsiiviginninnissamut piumasaqaatinik ammaassinngitsoq. Taamaattumik tamanna pillugu Naalakkersuisut ernummatissaqanngillat. Aatsitassarsioqatigiiffimmit inatsisip nunami maani atuuttup akuersaarumaneqannginnera, piumasaqaatillu atuuttut akuersaarumaneqannginnerat, uggornarpoq.
Isumaqatigiissitsiniarnissaq pillugu isumaqatigiissuteqartoqanngilaq
Isumaqatigiissitsiniarnermik suliami pineqarpoq, ETM Kuannersuarni suliniummut piiaanissamut akuersissummik pisinnaatitaaffeqarnersoq.
Naalakkersuisoq nassuiaavoq, isumaqatigiissitsiniarnermut eqqartuussiviup suliami aalajangiinissamut pisinnaatitaaffeqannginnera Naalakkersuisunit aalajangiusimaneqartoq, misissueqqissaarnissamullu akuersissutinut piumasaqaatini nalinginnaasuni aalajangersagaq erseqqissaassutigineqartoq, tassani allassimalluni, aalajangiinerit ingerlatsivimmit naliliinermik tunngaveqartut isumaqatigiissitsiniarnikkut aalajangiivigineqartussaanngitsut.
ETM isumaqatigiissitsiniarnermik suliami 76 milliarder koruuninik taarsiivigineqarnissamik qinnuteqarsimavoq, Naalakkersiusullu aalajangiusimavaa, isumaqatigiissitsiniartarnermut eqqartuussivik sulimi aalajangiinissamut piginnaassuseqanngitsoq, Naalakkersuisunullu suliassanngortitsinerit eqqartuussivinni ingerlanneqartariaqartut. Isumaqatigiissitsiniarnermut eqqartuussiviup maanna suliaq suliareqqissavaa suliami aalajangiisinnaanissamut piginnaassuseqarnerminnik isummerfiginnissallutik.
Piiaanissamut pisinnaatitaaffeqanngitsut
Naalakkersuisut aamma isumaqarput, aatsitassarsioqatigiiffik misissueqqissaarnissamut akuersissutaateqarnermikkut VVM-imut VSB-mullu nalunaarusianut piumasaqaatinik naammassinninnermikkut piiaanissamut akuersissummik isumamineersumik pissarsisinnaanerminnik isumaqarnerminni ilumoornerarneqarsinnaanngitsut. Aamma naak Naalakkersuisuusimasut 2013-imi inatsisitigut tunngavissanik suliaqarsimagaluartut Kalaallit Nunaanni uranimik iluaquteqarnissamik ajornarunnaarsitsisussanik.
- Ilumoorpoq suleqatigiinneq tamanna pisimammat, aamma inatsisitigut tunngavissanik Kalaallit Nunaanni uranip iluaqutigineqarnissaanik ajornarunnaarsitsisunik pilersitsisoqarsimasoq. Kisianni aatsitassarsioaqatigiiffik qaqugukkulluunniit piiaanissamut akuersissummik nalunaaruteqarfigineqarnissamut pissusissamisoortumik ilimagineqarsinnaasutut oqaatigineqarsinnaanngilaq.
Taanna isumaqarpoq, aatsitassarsioqatigiiffiup suliap ingerlanerani ilisimajuaannarsimagaa, misissueqqissaarnissamut akuersissummik tunineqarnermik kingorna piiaanissamut akuersissummik nalunaaruteqarfiginissamut pisinnaatitaaffimmik atuuttoqanngitsoq.