Neqi millioninik amigartooruteqartoq – KNI akiitsunik 142 mio. kr.-nik isumakkeerinnippoq
Toqoraavik Neqi 2,5 mio. kr.-nik amigartooruteqarpoq. Ingerlatseqatigiiffik piginnittoq nammineq aningaasaatit iluarsiniarlugit akiitsunik amerlasuunik isumakkeerinnippoq.
KNI-p 2022-mi ingerlatseqatigiiffik aqutani Neqi ukiuni arlalinni toqqortikkamik amigartooruteqarluni ingerlasimasoq paasivaa.
Paasissutissaq Namminersorlutik Oqartussanit pigineqartumi KNI-mi kusanaatsuliortoqarneranik taaneqartumi iluarsaassisoqarnerani paasineqarpoq, tassani ilaatigut ingerlatseqatigiiffiup toqqorsiviini amerlanaaraluni naatsorsuutaanni peqquserluttuliortoqarsimanera paasineqarpoq.
Neqi ukiumoortumik naatsorsuutinik saqqummiussaqaqqammerpoq, tassani suli amigartooruteqartoqartoq takuneqarsinnaavoq. Toqoraavik 2,5 mio. kr.-nik amigartooruteqarpoq. Ingerlatseqatigiiffiup ukioq naatsorsuiffigisaa apriilimit marsimut ingerlavoq.
KNI-p akiitsut 142,5 mio. kr.-it Neqimi nammineq aningaasaatit iluarsiniarlugit isumakkeerinnissutigisimagai, naatsorsuutini aamma atuarneqarsinnaavoq.
13 mio. kr.-nik tapiissuteqarfigineqartoq
Akiitsunik isumakkeerfigineqarnermigut Neqi 7 mio. kr.-nik nammineq aningaasaateqarpoq.
2,5 mio. kr.-nik amigartooruteqarneq siuliani ukiumi naatsorsuiffiusumit pitsaaneruvoq, tassani 10,7 mio. kr.-nik amigartooruteqartoqarpoq. Tamatuma saniatigut Neqip kaaviiaartitani 34,3 mio. kr.-nut qaffariartippai, naatsorsuiffiusumi kingullermi 29,8 mio. kr.-niupput.
Neqi toqoraavimmik Narsami ingerlataqarpoq. Ingerlatseqatigiiffik naapertorlugu sumiiffimmi savaatillit ukiumut katillugit savaaqqanik 20.000-nik tunisassiortarput. Savaaqqat Neqimi savaaqqat neqaat 350 tonsinngorlugit suliarineqartarput.
Ingerlatseqatigiiffik Namminersorlutik Oqartussanit kiffartuussinissamut isumaqatigiissummit 13 mio. kr.-nik ukiumut tapiissuteqarfigineqarluni ingerlanneqarpoq. Neqimi peqquserluttulioirtoqarnerata kingorna aningaasaqarneq iluarsiniarlugu, tapiissutit annertuumik qaffanneqarnikuupput, siornatigut 7 mio. kr.-usimapput.