Nettorvet matuvoq: Nalaasaarfiit aappaluartut tuniuminaapput
Brugsenip nittartakkakkut nettorvet.gl-ikkut tuniniaanini matuaa. Nioqqutissat aaneqanngitsut amerlavallaartut toqqorsivimmi initupput tuniniaruminaassinnaallutillu.
Tuluit oqariartaasiat 'one man's trash is another man's treasure ' (angutip igitaa angummut allamut iluaqutaalluarsinnaavoq) pisut ilaanni ilumoorsinnaavoq. Pisulli ilaanni nalaasaarfimmik aappaluartumik pisisussaagaluartup pisiniarunnaarnerani piserusuttumik nassaarniarneq ajornakusoorsinnaavoq.
Tamannalu Brugsenip toqqorsiviani unammilligassaqalersitsivoq, taannalu pissutigalugu Nettorvet.gl matuneqarpoq.
- Nettorvet.gl taamaatsillugu matussallugu aalajangerpugut. Nittartakkakkut ullutsinnut naleqqunnerusumik aaqqiissuteqarniarpugut, Brugsenimi sulisoqarnermut, attaveqarnermut nittarsaassinermullu pisortaq, Benny Reffeldt Otte, Sermitsiaq.AG-mut oqaluttuarpoq.
IT-mut atortunut nutaanut naleqqutinngitsoq
Nettorvet.gl IT-mut aaqqiissummik pisoqaanerusumik tunngaveqartoq, taassuma nassuiarpaa, ilaatigut IT-mut atortunut nutaanut Coop-ip atuligaanut ataqatigiitinneqarsinnaanera ajornakusoormat.
Nettorvet.gl-imi nioqqutissamik inniminniisoqarsinnaavoq, taannalu nunatsinnut nassiunneqartarpoq, aaneqarneranilu pisiniarfimmi akilerneqarsinnaasarpoq.
- Aatsaat aallernermi akiliisussaaneq ajornartorsiutaavoq, nioqqutissallu pisiarinissaanut pisussaaffiliisoqartannginnera. Amerlavallaartut nioqqutissanik inniminniisut aallertanngillat. Taamaattumik nioqqutissanik pisisartunut allanut tunisiniarnissaq ilaatigut ajornakusoortarsimavoq.
Assersuutigalugu Nuummi Brugsenimi nalaasaarfik aappaluartoq maanna saqqumitinneqarpoq.
Danmarkimit suli allatsitsisoqarsinnaavoq
Nioqqutissallu taamaattut toqqorsivimmi initusinnaasarput, immikkullu nittarsaakkuminaattarlutik.
Taamaattumik Brugsenimi sulisut nittartakkakkut pisiniarnissamut nutaamik pitsaanerusumillu aaqqiissutissamik suliaqarput, kisianni aaqqiissut nutaaq qaqugu piariissanersoq nittarsaassinermut pisortap oqaatigisinnaanngilaa. Illuanik tamatuma pinissaata tungaanut pisisartut periarfissaqartut oqaatigaa.
- Pisisartut coop.dk/shoppingimi pisiarerusutaminnik takusaqarsimagunik pisiniarfitsinni sulisunut attaveqarnissamut tikilluaqqusaapput. Taava immikkut pisiniaq peqatigalugu allatsitsissaagut, Benny Reffeldt Otte oqarpoq.