Niaqornaarsummi imeqarfik serlersaarfigineqarsimasoq
Nukissiorfiit atortui Tele-Postip atortuisulli akulikitsumik seqqortaarfigineqartarput. Niaqornaarsummi imeq maannakkorpiaq imaatigut angallammik nunaqarfimmut oqqunneqartarpoq, nunaqarfiup imermut pumpia seqqortaarfigineqarsimagami atorsinnaajunnaarsimammat.
Tele-Postip attaveqaasersuutai nunami sumiiffinni assigiinngitsuni sqqortaarfigineqartarput. Tamanna Sermitsiaq.AG-p sapaatip akunnerani kingullermi oqaluttuaraa.
Tele-Postili kisimi taamatut ajornartorsiuteqarpasinngilaq. Nukissiorfiit pilersuisutut ingerlatseqatigiiffiusoq nittartakkamigut ilisimatitsivoq, ingerlatseqatigiiffiup atortui akuliktsumik seqqortaarfigineqartartut.
Kingullertigut Niaqornaarsummi imeaqarfiup puttasua seqqortaarfigineqarsimavoq:
- Niaqornaarsunni imiisivik tatsimit imeqarfimmiit pumpe aqqutigalugu maannakkut sapaatit akunnerat sinnerlugu pilersorneqanngilaq, puttasup aallaarsaralugu aserorneqarsimanera pissutaalluni.
- Pumpe nalinginnaasumik puttasoq iluaqutigalugu puttasartoq tatsip naqqanut kivigami sioqqanik milluaasimavoq tamatumalu kingornatigut aserorluni, Nukissiorfiit nittartakkaminni allapput.
Imermik Aasianniit assartuisoqartariaqartoq
Serlersaarisoqarsimanerata kingunerani, Aasianniit imermik angallat attartugaq atorlugu Niaqornaarsunnut assartuisoqartariaqarsimavoq, nunaqarfimmi najugallit taamaalillutik imermik amigaateqarsimanngillat:
- Assorsuaq uggornarpoq inuit atortutsinnik aallaammik eqqaassisarnerat. Nukissiorfiit inuiaqatigiit tamarmik pigivaat atortutsinnillu aallaallugit aserortinneqarsimasunik iluarsaassinermut aningaasanik atuigaangatta, taava aningaasat atukkavut pilersuinitta ineriartortinneqarneranut atorneqartussaagaluartut atortarpagut, Nukissiorfinni Teknikeqarnermut pisortaq Kenneth Nyland oqarpoq.
Utaqqiisaagallartumik imermik pilersuineq aaqqinniarlugu aammattaaq suliaqartoqarpoq, tatsimit imeqarfimmit nunaqarfimmit kilometerinik pingasunik ungasissuseqartuminngaanniit.