Nioqqutinik tunisaqartartoq aatsaat taama sinneqartooruteqartigisoq
Arctic Importip isertitani 2021-mi sisamariaammik amerleriartippai, taakku 10 millionit koruuniupput.
Atlantikup Avannaani avammut tunisisartoq aamma nioqqutissanik amerlasuunngorlugit tunisisartoq, Arctic Import, siorna aatsaat taama angusarissaartigaaq. Kaaviiaartitat 50 procentinik annertusineqarput, isertitallu sisamariaammit amerlanerusunik 10,1 millionit koruuninut amerleriartinneqarput, ukioq kingulleq 2,2 millionit koruuniusimapput.
Arctic Imporr tusagassiuutinut nalunaarummi taama allappoq.
Arctic Import ilaatigut ulluinnarni nioqqutissanik KNI-p pisiniarfiinut Pilersuisumut 64-inut Rema Distribution suleqatigalugu tunisisarpoq. Isumaqatigiissut annertooq 2021-p aallartinnerani atuutilersoq.
Arctic Import siornatigut Nuummi Ilulissanilu pisiniarfinnik ingerlatsinikuuvoq, kisianni taakku 2019-imi Pisiffimmut tunineqarput.
- Sivisuumik suliaq
Ingerlatseqatigiiffiup maanna nioqqutissanik amerlasunik tunisisarneq aalluppaa, tamannalu angusarissaarnermut pissutaaqataavoq.
- Suliffeqarfissuarmi ineriartorneq naammagisimaartorujussuuarput. 2017-imi aalajangernitta sunniutai maanna takuagut, tassa Atlantikup Avannaani nioqqutissanik amerlasuunngorlugit tunisisarnermut nukitta atornerunissaannik aalajangerneq.
- Suliaq sivisuumik ingerlavoq, upernaakkullu 2020-mi atuisunut tunngasunik suliagut unitsippagut. Taamanerniilli pikkoriffiginerpaasarput aallussimavarput – tassa suliffeqarfimmit suliffeqarfimmut niuernermik suliat, tamannalu maanna taama sukkatigisumik siuariartornitsinnut pissutaaqataavoq, pisortaaneq Thomas Hjort oqarpoq.
Mittarfissani periarfissanik takusaqarsinnaasoq
Arctic Importip ukiuni aggersuni kaaviiaartitani marloriaatinngortikkusuppai, pisortarlu mittarfiit nutaat atulerpata Kalaallit Nunaanni siuariarnissamut periarfissanik annertuunik takusaqarsinnaavoq:
- Mittarfiit nutaat ukiut arlaqanngitsut qaangiuppata piareerpata, Kalaallit Nunaanni aningaasaqarneq malunnaatilimmik siuariarnissaa qularnanngilaq. Takornariartitsineq coronap tuniluunneranit sakkortuumik eqqorneqarsimavoq, kisianni takornariartitsisarneq Atlantikup Avannaani nalinginnaasumik siuariartorpoq, timmisartumillu angallaviit nutaat ineriartorneq una suli tapersissavaat, Thomas Hjort taama isumaqarpoq.
Arctic Import ilaqutariinnit pigineqarpoq, 100-nit amerlanerusunillu sulisoqarpoq.