Nioqqutissanik 1,3 mio. kr.-t nalinginut igitsisimasoq: - Tutsuiginartumik umiarsuarmik assartuisartumik pisariaqartitsivugut

Nioqqutissanik asiupallattartunik igitsisarneq annikillisinniarlugu Brugseni Kalaallit Nunaatalu akornanni tutsuiginartumik toqqaannartumillu umiarsuarmik assartuisartumik ujartuivoq.

RAL-imi kinguaattoortoqarnera kukkusoqarneralu pissutigalugit Brugseni nioqqutissanik asiupallattartunik amerlasuunik, pisiniarfiuteqarfik nalunaaruteqarpoq.

Pisiniarfiuteqarfik Brugseni umiarsuaatileqatigiiffimmut Namminersorlutik Oqartussanik pigineqartumut Royal Arctic Linemut (RAL) isornartorsiuivoq.

Pisiniarfiuteqarfik naapertorlugu umiarsuarnik assartuisarneq allanngorartoq pisiniarfiuteqarfimmut aningaasanik nukissanillu naleqartarpoq, umiarsuaq assartuisoq kinguaattooqqappat imaluunniit containerit nillataartitsiviusut kukkusumik suliarineqaraangata, nioqqutissat asiupallattartut eqqaavimmut igiinnarneqartarnerat pissutigalugu.

- 2023-mi qaammatini arfineq-pingasuni siullerni maannamut nioqqutissat pisiarineqarneranni akii naapertorlugit 1,3 millionit kronit sinnerlugit nalillit eqqareersimalerpavut, kinguaattoornernik imaluunniit RAL-ip containerinik kukkusumik suliarinnittarnerinik pissuteqartumik, Brugseni tusagassiuutinut nalunaarummi allappoq, nangillunilu:

Nerisassanik annertuumik igitsiinnartarneq

- Nioqqutissat nillataartitsivimmiititassat eqqarneqarajupput kingusippallaartukkut apuunneqarsimasarmata containerilluunniit nillataartitsiviit qerititsiviillu kukkusumik suliarineqartarmata. Nerisassanik eqqaanersuit, kaaviiaartitatigut annaasat, sulisutta nioqqutissanik immikkoortiterinermik suliaqarnerujussuat, pisiniartartorpassuit pisiniarfinni nutaanik pisiassaqalersimannginnerannik tupigusuutiginnittut… tamakkua tamarmik saniatigut kinguneraat aningaasartuuteqarnerunerit, pakatsisitsinerit nerisassarparpassuarnillu asiutitsiinnarujussuarnerit!

Pisiniarfiuteqarfik umiarsuarmik assartuisoqarnermik, assartuinissamullu periarfissanik pisortaneersunik pisiariaqartitsilluinnartuusoq, Brugsenip oqaatigaa.

RAL-ip ukiuni kingullerni Atlantikukkut angalaneq allanngortippaa, umiarsuit Danmarkimi Aarhusimit aallartalertillugit aamma Atlantikup avannaani umiarsualiviit allat Eimskip suleqatigalugu angalasalerlutik.

Ullormi allami tikittarnissaat siunnersuutigigaat

Brugseni akerlianik aqqummik toqqaannarnerusumik kiisalu Nuummut ullormi allami tikittoqartarnissaanik ujartuivoq, pisiniarfiuteqarfiup nioqqutissanik nutaanik suliaqarnera oqinnerulissammat. Brugsenip tamanna umiarsuaatileqatigiiffiup atuisartunik misissuineranut atatillugu nalunaarutigisimavaa. RAL-ili tusarnaarsimanngitsoq, Brugseni isumaqarpoq:

- Neriuutigisimagaluarparput RAL-ip kissaatigisavut nammineq ujartornikuusatik malillugit iliornissaat, tamannali aaqqiissutissarsiorfigineqarnani umiarsuup Nuummut pingasunngornikkut sisamanngornikkulluunniit tikittalernissaanik siunnersuuterput itigartinneqarpoq piviusorsiornerunngimmanngooq.

- Atlantikukkut ingerlaarfissamik nioqqutissat Danmarkimiit Kalaallit Nunaannut apuunneqartarnissaannik pingaartitsiviusumik sooq pilersaarusiortoqarsinnaannginnersoq paasitinneqanngilagut. Pilersaarummi taanna taakkua sullitaannut pingaarnernut, ingammik niuertarfeqarfinni suliniuteqartunut pitsaanerpaavoq.

Sermitsiaq.AG-p isornartorsiuineq pillugu Royal Arctic Linemit oqaaseqartitsinissani sulissutigaa.

Powered by Labrador CMS