Ussassaarut
Nioqqutissat nutaat nunatsinnut sapaatiuppat tikiunneqassapput
Tukuma Arcticap teknikkikkut ajoquteqarnera pissutigalugu Royal Arctic Line assartuinermi sapaatip akunneranik kinguaattooqqareersorlu, nioqqutissat nutaat tikiunneqarnissaanut ulluliisoqarpoq. Assartugassat naatsorsuutigineqareersut, taakkulu saniatigut containererpaaluit nioqqutissanik nutaanik imaqartut sapaatiuppat tikissasut, RAL ilisimatitsivoq.
Ussassaarut
Ussassaarut
Ussassaarut
Tukuma Arcticap atortutigut augustip aallartinneranili ajutooqqanera niuertarfinnut pilersuisussaanerup naammassisinnaannginneranut ernumassuteqartitsivoq. Nioqqutissallu nungukkiartulerneri innuttaasunut aamma ernumanarsimavoq.
Umiarsuaq naatitanik nioqqutissanillu allanik assartuisussaagaluartoq tikinngitsoormat, niuertarfinni ilisiviit arlallit immerneqarsinnaasimanngillat, pingaartumik naatitaarniarfiit. Isumalluartoqarsinnaalerporli.
Royal Arctic Line Sermitsiaq.AG-mut ilisimatitsivoq assartugassat tallimanngornermi 18. august tikittussatut naatsorsuutigineqarsimagaluartut, assartuummut attartorneqartumit Jonni Ritscherimit usigineqartut. Nioqqutissat Jonni Ritscherimiit Islandimi usigiarneqassappit, Silver Marymullu usiliunneqarlutik. Silver Mary nioqqutissanik nutaanik usilluni Nuummut sapaammi 20. augustimi tikittussatut naatsorsuutigineqarpoq.
Assartukkat sapaatip akunneranut - sinnilaarlugulu
Nioqqutissat sapaatip akunneranut ataatsimut naammattussatut naatsorsuussat niuertarfinnut tikiussuunneqangajalerput. Umiarsuarli nioqqutissanik usisoq siulleq tikippat containerit nioqqutissanik nutaanik imallit aqqanilinnik amerlanerussapput. Containerit aqqanillit Tukuma Arcticap 11. augustimi tikiuttussaasimagaluarpai.
Tukuma Arctica Aarhusimit 4. august aallartussatut naatsorsuutigineqarsimagaluarpoq. Kinguaattoormalli assartuinissamut pilersaarusiornissaq ilungersunarnerulersimavoq. RAL-ip ilisimatitsissutigaa Tukuma Arctica Aarhusimit 14. august aallartoq.
Ussassaarut
Sinerissami illoqarfiit pilersorneqarnerat isumannaarniarlugu umiarsuaatileqatigiiffiup assartuutini pilersaarusiorsimavai, tullereeqqissaarlugit aallartussanngorlugit.
Assartukkat Islandimi umiarsuarmut allamut usiliunneqassapput
Silver Mary Nuummiit Reykjavikip tungaanut nunatsinnit nioqqutissanik usilluni aallarpoq. Nioqqutissat nunatta avataanut tunisassat Islandimi niuneqassapput, Aarhusillu tungaanut ingerlaartussamut Jonni Ritscherimut usiliunneqassallutik. Jonni Ritsvherip Islandimut ingerlaarnermini usisai, Reykjavikimi niuneqassapput, Silver Marymullu usiliunneqarlutik. Usinik paarlaaqatigiinneq pereerpat Silver Mary Nuup tungaanut utissaaq. Nuummi Irena Arctica usilersorneqarnissaminut piareersimassaaq, sinerissamut assartuineq aallarteriaannanngussallugu.
Sinerissamut nioqqutissanik assartuinermut pilersaarutigineqartut RAL-ip kingorna ilisimatitsissutigissagai, RAL nittartakkamini allappoq.