Nioqqutissat sinerissami suli kinguaattooqqasut: - Inuiaqatigiinnut tamanna ajoqutaasinnaavoq

Tusagassiorfinni, inoqatinut attaveqaqatigiittarfinni aamma Nuummi pisiniarfissuarni maluginiarneqarsinnaasutut illoqarfiit pingaarnersaanni pisiniarfissuarni ilitsiviit imaqanngingajattut sapaatip akunnerisa arlaqanngitsut matuma siornagut takuneqarsinnaapput.

Aviisi Sermitsiaq taama allappoq.

Tamatumunnga patsisaavoq, Tukuma Arcticap teknikikkut ajoquteqarnerata kinguneranik umiarsuup assartuutip ulluni 14-inik kinguaattoornera, taamalu nioqqutissat nassiunneqartut kinguartoorutigineqarmata.

Aggustip 20-anni nioqqutissat Nuummut kiisami tikipput, tamannalu illoqarfiit pingaarnersaanni innuttaasunit nuannaarutigineqaqaluni. Sinerissamili illoqarfiit allat kinguaattoornernit suli eqqugaaqqassasut, Royal Arctic Linep nittartakkamini oqaatigaa.

Umiarsuaatileqatigiiffiup nioqqutissanik sinerissamut assartuinerup septembarip qeqqata tungaanut ullunik marlussunnik pingasunilluunniit kinguaattooqqanissaa naatsorsuutigaa.

Innuttaasut ilaata, Kullorsuarmi najugaqartup, kinaassutsiminik isertuusserusuttup oqaatigaa, nunaqarfimmi Pilersuisup pisiniarfiani ilitsiviit aasaanerani arlaleriarlutik imaaruttartut. Aterminik isertuusserusuttoq aaqqissuisoqarfiup kinaanera ilisimavaa.

- Pisiniarfitsinni nioqqutissanik amigaateqartorujussuuvugut. Suut tamarmik amigaataapput. Nioqqutissanik pajuttup tikinneranit ulloq ataaseq marlulluunniit qaangiutiinnartut ilitsiviit tamarmik imaaruteqqittarput. Kullorsuarmi inuit 500-uuvugut, taamaalilluni nunaqarfik angisuujuvoq, nioqqutissallu pisariaqartinneqarluinnartut amigaataalersarlutik, innuttaasut ilaat taanna oqarpoq.

Taassuma ilaatigut amigaataasartut taakkartugai tassaapput immuup qalippernera, qallersuutissat aamma nioqqutissat nutaat soorlu naatitat, nioqqutissanik pajuttoq aallarsimatsiaannartoq nungunneqartartut.

Aviisimi Sermitsiami atuarnerusinnaavutit. Aviisi uani pissarsiariuk:

Sermitsiaq - 08/09-2023

Klik her for at læse