NIPISANNIARNEQ 2024
Nipisanniarneq ataasinngorpat aallartissaaq
KNAPK aporaannersuaqarnissamik siorasaaruteqaraluartoq, ukioq manna nipisanniarnissami pisassiissutit piffissalersuutillu piareerneqarput. Aqutsiveqarfiit siulliit ataasinngorpat apriilip aallaqqaataani nipisanniarnissamut ammarneqassapput.
Aalisartut piniartullu kattuffiat, KNAPK, allatut iliornissamik pilersaaruteqaraluartoq, taamaattoq nunap immikkoortuini aalisartut ukioq manna nipisanniarnissamut pilersaaruteqaleruttorput.
KNAPK-mit aporaanneq annertooq nalunaarutigineqarpoq, sinerissami aalisartut aalajangersaaqataanikuupput qaqugu nipisanniarneq aallartinneqassanersoq.
Aalisarnermut Piniarnermullu Naalakkersuisoqarfik tusagassiutinut nalunaarummi ilisimatitsivoq, najukkani tunitsiveqarfiit aalisartullu peqatigiiffiisa sinniisai aalajangiinissaq siunertaralugu 6. marts-imiit 22. marts ilanngullugu tusarniaaffigisimagai.
Tusarniaanerup kingorna ukioq manna nipisanniarnerup piffissalersugaanera aamma pisassiissutit annertussusissaat aalajangersarneqarput.
Pisassiissutit 1.500 tonsit ataatilaannguarpaat
Pinngortitaleriffik ukiumoortumik qanoq pisassiissuteqartoqassanersoq siunnersuuteqarpoq.
Pisassiissutissatut siunnersuutigineqarput 1.475,3 tonsit. Naalakkersuisut siunnersuut malilluinnaqqissaangajallugu iliuuseqarput, ukiumoortumimmi pisassiissutit 1.495,2 tonsiussasut aalajangiipput.
Kalaallit Nunaanni naatsorsueqqissaartarfik malillugu umiatsiaararsortut angallatillu mikinerit arnarlunniarnermit 38 millionit koruunit missaannik siorna isertitaqarput, arnarlunniarnermilu tunisinerpaat isaatitsiffiulluarnerpaasimasullu Qeqertarsuatsiaat Kangaamiullu akornanni aalisarnermeersuullutik.