Nipisanniarneq Avannaani maajip 1-ani aallartissaaq
Avannaani aalisartut sapaatiuppat maajip aallaqqaani nipisanniarsinnaalissapput. Taama Aalisarnermut Piniarnermullu Naalakkersuisoqarfik nalunaaruteqarpoq.
Attumiit avannamut aalisartut aqagumiit (sapaat) nipisanniarsinnaalissappat.
- Aalisarnermut Piniarnermullu Naalakkersuisoqarfimmiit aamma KANUAANA-miit erseqqissaatigineqassaaq aalisarneq, tunisineq imaluunniit nipisannik suaanillu aqutsiveqarfinni aalisarnerup ammannginnerani pisineq inerteqqutaammat. Naalakkersuisoqarfik allappoq.
Aqutsisoqarfimmi 1A-mi pisassat katillugit 197,5 tonsiupput, aqutsisoqarfimmilu 1Ba-mi pisassat 160,3-iullutik.
Aqutsiveqarfinni tamani ataannartumik aalisarfissat ullut 60-iupput, ullut ammarne-qarfianniit imaluunniit pisassat tamakkerneqarnissaasa tungaannut.
Aqutsisoqarfinni allani nipisanniarnerit apriilip 18-ani aallartinneqarput, Royal Greenland KNAPK-lu akimik isumaqatigiissuteqareertullu. Nipisat suaasa kiilumut qanoq akeqartinneqarnissaat sapaatit akunnerni arlaqartuni isumaqatigiinngissutigineqarpoq.
