Blue Water Greenland siorna aalisakkanik suannillu nillataartunik saattuanillu uumasunik misileraalluni nassiussanik qulit inorlugit amerlatigisunik passussivoq. Ukioq mannali nassiussalerisup aalisartut siunnersornerannik, Air Greenlandilu Greenland Airportsilu suleqatigalugit nipisaat suaannik nillataartunik nassiussinernik ulapputeqarpoq.
- Aalisartunit assigiinngitsunit arlalinnik paasiniaaffigineqartarpugut. Maanna aalisakkerisut anginerit kisimik apersuisarunnaarput, aammali minnerusut, aalisartut ataatsimoortut nipisaat suaannik nillataartunik nassitserusuttut apersuisarput, imaluunniit aalisartunit toqqaannartumik aperineqartarpugut, Anne Sophie Zacho Thygesen, Blue Water Greenlandimi head of operations Sermitsiamut oqarpoq.
Blue Water Greenland siorna aalisakkanik suannillu nillataartunik saattuanillu uumasunik misileraalluni nassiussanik qulit inorlugit amerlatigisunik passussivoq. Ukioq mannali nassiussalerisup aalisartut siunnersornerannik, Air Greenlandilu Greenland Airportsilu suleqatigalugit nipisaat suaannik nillataartunik nassiussinernik ulapputeqarpoq.
- Aalisartunit assigiinngitsunit arlalinnik paasiniaaffigineqartarpugut. Maanna aalisakkerisut anginerit kisimik apersuisarunnaarput, aammali minnerusut, aalisartut ataatsimoortut nipisaat suaannik nillataartunik nassitserusuttut apersuisarput, imaluunniit aalisartunit toqqaannartumik aperineqartarpugut, Anne Sophie Zacho Thygesen, Blue Water Greenlandimi head of operations Sermitsiamut oqarpoq.
Nipisanniarneq ulloq 1. april aallartimmalli, sapaatit akunnerini marlussunni kingullerni ullut tamakkiapajaarlugit nipisaat suaannik nillataartunik nassitsisoqartarpoq.
- Arnarlunniarneq aallartimmalli ullut tamakkiallugit, tassa sapaatit akunnerini kingullerni marlunni pingasuniluunniit ulapippugut, tamannalu nuannerpoq, aamma niuernikkut isigalugu, aammali ingerlalluartoqarnissaanik annertuumik kissaateqaratta. Tamatumalu iluatsinnera takullugu assut nuannerpoq, Anne Sophie Zacho Thygesen oqarpoq.
Annertuumik amerleriartut
Arnarlunniarnerup aallartinnissaanut aalisartunit nipisaat suaannik nillataartunik timmisartukkut nassiusserusuttunit inniminniisoqareersoq Anne Sophie Zacho Thygesen nassuiaavoq, kingusinaalaartumilli aallartipput.
- Nipisanniarnerup apriilip aallaqqaataani aallartinneranit nipisaat suaannik nillataartunik amerlasuunik nassitsinissarput neriuutigisimagaluarparput, aalisartullumi aamma taama neriukkaluarput. Inniminniinerilli amerlasuut piareeqqapput, utaqqisariaqarsimavugulli. Sapaatilli akunnerini kingullerni ullut tamarluinnangajaasa nassiussisarpugut. Tamannalu siornamut sanilliullugu annertuumik amerleriarfiuvoq.
- Maanna suaat Danmarkimut nassiuttarpagut, Europali tamakkerlugu nassiussisinnaagaluarpugut, tamatumanilu EU-mik niueqatigiinnermik isumaqatigiissuteqartoqarnera patsisaavoq. Aalisartulli arlallit Danmarkimi akitsorterisunut ingerlatitseqqiisartunulluunniit qulakkeerinissaaq nalilersimagaat isumaqarpunga. Tassanngaannillu piffissap uninngaffiusup sivikinnera pissutigalugu niuerfimmiilerput, piffissallu sivikitsup ingerlanerani suaat Europami aalisakkanik niuerfissuarnut anngunnissaat ilimagaarput. Tassanilu Blue Waterimi allaffivut nunallu killeqarfii akimorlugit attaveqaativut annertuut iluaqutigisinnaavagut, sullitallu annguffigerusutaannut ikiorlugit.
- Aalisartut sapaatip akunnerata aallartinnerani piffissami siusinnerpaami niuerfimmik eqquinissartik kissaatigaat, tassanilu sapaatini, ataasinngornerni marlunngornernilu nassitserusuttarput.
Blue Water Greenlandip sapaatit akunnerini pingasuni kingullerni nipisaat suaat nillataartut timmisartukkut nassiussornerat ulapputigaa.
Privatfoto
Pilersaarut B
Blue Waterip timmisartup sila pissutigalugu taamaatinnarneranut atatillugu pisisartunik siunnersuinissami piffissamik atuerusuttarpoq, taamaalillunilu taamaattoqarnerani pilersaarusiorlutik.
- Mittarfiup sanaartorneqarnerata nalaani sullitanik pilersuinermilu aqqutini allani inaarutaasumik periarfissanik misissuinermi piffissaqarsimanerput pingaaruteqarluinnartuuvoq. Tassanilu soorunami timmisartup taamaatiinnarnerani pilersaarut B-mik peqarnissaq aamma ilaavoq. Nassiussat maanna mittarfimmut nalunaaqutaq qulingiluanut tunniuttarpagut, tassa Tuukkap Danmarkimit tikinnissaa sioqqullugu, taamaammallu aallarnissap taamaatiinnarnerani allatut periarnissaq tamanut pingaaruteqarpoq.
Maannalu arnarlunniarneq naammassippat aalisartut aalisakkanik nillataartunik nassitsisalernissaat Blue Water Greenlandimit utaqqimaarneqalereerpoq.
- Sullitatta danskit niuerfiat arnarlunniarnermi sapinngisamik siusinnerpaamik soorunami annguffigerusuppaat. Ingammik poorski annertuumik kissaatigineqarpoq, Danmarkimimi tamakkunannga piumanninneq taamaalinerani annertunerpaasarmat, ingammillu ukioq manna danskit aalisarnerisa uninngatikkallarneqarnerata nalaani.
