Nipisat timitaat amerlasoorpassuit eqqaannarneqartartut

Ukioq manna nipisat suaat 1.495 tonsit sinnilaarlugit sinerissami aqutsiveqarfinnut arfilinnut pisassiissutigineqarput, suannillu piumaneqarluartunik tunisineq piffissami matumi aqutsiveqarfinni amerlanerpaani unissimalerpoq.

Sinerissami aalisakkeriviit arlallit nipisat suaannik tunitsiviugaluartut, aalisakkerivik ataasiinnaq nipisat timitaannik tigooraavoq, taamaattumillu ukiut siulii assigalugit ukioq manna nipisat timitaat tonserpassuit atorluarneqaratik nutaajutillugit imaanut igeqqiinnarneqartarput.

Tamannalu pisuussutinik atorluaanissamik siunertaqarnermut naapertuutinngitsoq akuersaarneqarsinnaanngitsorlu, atorluarneqarsinnaalernissarlu siunertaralugu aalisarnermut attuumassuteqartut suleqatigalugit iliuuseqartoqartariaqartoq, qimminut nerukkaatissorfimmik Milak Productionsimik piginnittoq, Ulloriaq Kreutzmann oqarpoq.

Eqqaaginnarneq annertooq

Nipisanniarneq nungusaataanngitsumik aalisarnertut taallugu 2015-imi MSC-mik meqqeqalerpoq. Pisuussutinillu uumassusilinnik sapinngisamik annertunerpaamik atorluaanissaq pingaartinneqartoq Naalakkersuisut oqariartuutigisaraluaraat, taamaattoq nipisat timitaat tonserpassuit ukiut tamaasa eqqaannarneqartarput. Royal Greenland nunatsinni amerlanerpaanik aalisakkanut tunitsiviuteqarpoq, ukiorlu manna suliffeqarfissuup tunitsiviini 13-ini nipisaat timitaat pinnatik suaalli kisimik tunisaapput. Taamaatuttaaq Polar Seafood A/S-ip aamma Arctic Prime Fisheries ApS-ip tunitsiviinut nipisat suaat tunisaagaluartut, taakkunani nipisat timitaat aamma tunisaanngillat. Ilulissani Halibut Greenland ApS-ip aalisakkerivia ukioq manna kisiartaalluni nipisat timitaannik tigooraasuuvoq.

Nassuiaatissaqartoq

Royal Greenland tunisassiassanik imaaneersunik piujuartitsinermik atorluaanermillu tunngavilimmik tunisassiornissamik pisussaaffeqartoq suliffeqarfissuarmiit oqariartuutigineqarpoq, taamaakkaluartoq ukioq manna nipisat suaannik tunitsiviusunut 13-inut nipisat timitaat tunisaanngillat – tamannali nassuiaatissaqartoq, saarullinnut qaleralinnullu ingerlatsinermut pisortaq Sten Sørensen oqarpoq.

Nipisat timitaat siusinnerusukkut kilomut 3 koruunit missaannik akilerlugit Royal Greenlandimut tunisaanikuugaluarput, akigititarli appasippallaarmat aalisartut tunisinissartik orniginartissimanngikkaat suliffeqarfissuarmiit naatsorsuutigineqarpoq.

- Ukiut arlallit matuma siornatigut nipisat timitaat tunisassiatsinnut ilanngutsinnissaat pimoorullugu sulissutigisimagaluarparput, assigiinngitsunilli unammilligassaqarnerput pissutaalluni tunisassiorneq imminut akilersinnaasimanngilaq.

- Nipisat timitaat akikitsuararsuupput pisisartuniillu piumaneqarnerat killeqarpoq, taamaattumillu uagut aalisartullu iluanaarutigisinnaasimanngilagut.

- Nipisat timitaannik tunisassiornerup aningaasatigut ataqatigiissaarneqartariaqarnera unamminiarnartuuvoq, taamaammallu aalisartunut akit koruunimik ataatsimik qaffanneri tamaasa pisisartut akit qaffasinnerusut akilertariaqartarpaat, Sten Sørensen oqarpoq.

Nipisat timitaasa atorluarneqarnissaat siunertaralugu, suliffeqarfinnik tamakkuninnga tunisassiorusussinnaasunik ataavartumik attaveqartarlutik, aammali allanik soqutiginnittoqarpat taakku attaveqarfiginissaat tikilluaqquneqartoq, Sten Sørensen erseqqissaavoq.

Kinamut tunineqartartut

Siorna Halibut Greenlandip MSC-mik meqqeqalermat nipisat suaasa saniatigut timitaat aamma tunisaalerput, tamannalu aalisartuniit atorluarneqartoq, suliffeqarfiup pisortaa Erik Sivertsen oqarpoq.

- Aalisakkat pisarineqartut sapinngisamik tamaasa atorluarneqartarnissaat pingaartipparput, taamaattumik nipisat timitaat Kinamut tunisarpagut amialu chipsiliarineqartarpoq.

- Timitaasa tuninerinut kilomut 2,50 koruuneqarpoq. Aki appasikkaluarpoq kisianni aalisakkap igiinnarneraniik aalisartumut akissarsissutaanissaa uagutsinnut pingaarnerpaavoq, taanna oqarpoq.

Halibut Greenlandip Kitsissuarsunni aalisakkanik tigooraavia nipisat suaannik upernaap ingerlanerani aamma tigooraavoq.

Atorluaaneq aqqutissiuunneqartariaqartoq

Nipisat timitaat qimminut nerukkatissatut atussallugit pitsaalluinnartut, atorluarneqarsinnaalernissaallu siunertaralugu aalisarnermut attuumassuteqartut suleqatigalugit iliuuseqartoqartariaqartoq, Narsami qimminut savat aalisakkallu perlukui atorlugit qimminut nerukkaatissorfimmik Milak Productionsimik piginnittoq, Ulloriaq Kreutzmann oqarpoq.

- Nipisat timitaannik eqqaaginnarneq atorluaanissamik oqariartuuteqarnermut naapertuutinngilaq akuersaarneqarsinnaananilu. Milak Productions aallarterlaajuvoq siunissarlu qulakkeeqqaartinnagu containerinik qerititsivinnik nipisat timitaannut atugassanik aningaasaliisinnaanngilanga.

- Royal Greenland pisortanit pigineqarpoq inuiaqatigiinnilu akisussaaffeqarluni. Taamaattumik aalisakkat perlukuisa nipisaallu timitaasa atorluarneqarnissaat eqqarsaatigalugu aqqutissiuusseqataasinnaanissaat pingaaruteqarpoq, Ulloriaq Kreutzmann oqarpoq.

Halibut Greenland aamma Polar Seafood kisimik aalisakkat perluinik Milak Productionsimut akeqanngitsumik nassiussuisarput Royal Greenlandili taamaaliorneq ajorpoq.