PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Ilulissat, Kalaallit Nunaanni
takornariaqarnerpaaffiusoq, ukiuni kingullerni takornariarfigineqartarnera
annertuserujussuarpoq. Illoqarfik juunip aallartinneraniit septembarip
tungaanut takornarianik ornigarneqarluartarpoq.
Akunnittarfinnili unnuineq misigisassarsiornerlu
akisuallaalersimapput. Kalaallit Nunaanni akunnittarfiit ingerlalluarnerpaat
ilaata, Ilulissani Hotel Arcticip, siulittaasua taama isumaqarpoq.
- Kalaallit Nunaannut takornariarneq akisuallaarpoq.
Akunnittarfinniinneq aamma misigisassat akii qaffasippallaarput. Akit,
piumaneqarneq aallaavigalugu, qaffasinnerpaaffissaminniipput.
Ilulissani akunnittarfiit siuttuisa ilaanni, Hotel
Arctic A/S-imi, siulittaasoq Jacob Nitter Sørensen oqarpoq.
Taanna Air Greenland A/S-imi, akunnittarfimmik
piginnittumi, pisortaavoq.
Ilulissani unnuiffissaq, assersuutigalugu ukioq manna
juulip sisamaaniit tallimaanut, Hotel Arcticimi inunnut marlunnut 1.995
koruunilerlugu pingasunngormat inniminninneqarsinnaavoq. Hotel Ilulissani Hotel
Hvide Falkimilu 1.580 aamma 2.195 koruunit akornanni akeqarluni.
Tamanna Hotels.com-imi ujarlernermi paasinarsivoq.
Jacob Nitter: -
Annertunerpaaffissaaniippoq
Hotel Arctic 2023-mi naammaginartumik
angusaqanngilaq. Timmisartortitseqatigiiffimmi Air Greenlandimi aqutsisut
ukiumoortumik naatsorsuumminni taama allapput.
Akunnittarfiup naammaginanngitsumik
angusaqarneranut pissutaavoq inniminnikkanik kingusissukkut
taamaatitsiinnartarnerit, aamma ataatsimeersuarnerit amerlasuut Nuup avataani
pinnginnerat.
Aammattaaq nutarterineq pissutigalugu
piffissap ilaani unnuiffissanik inniminniisoqarsinnaasimanngilaq, tamannalu
aningaasartuuteqarnerulissutigineqarlunilu inissanik inniminninneqarsinnaasunik
annikinnerulersitsivoq.
- Ilulissani akunnittarfinni unnuineq
akisuallaalersimava?
- Oqanngilanga akisuallaartoq. Kisianni
maanna killiffik eqqarsaatigalugu akisuninngoqqissinnaanngilaq, Jacob Nitter
Sørensen oqarpoq.
- Hotel Arctic siorna aasaanerani
ilimagisannit ininik amerlanerusunik unnuiffigineqarsimanngila?
- Kingusissukkut taamaatitsiinnartarneq
pissutigalugu init inoqanngillat, oqarpoq.
- Tusarpara unammillertissi
akunnittarfimminni unnuiffissat akikinnerulersissimagaat?
- Akit piffissami
takornariaqannginneruffiani appartiinnarnissaat mianersuussassaavoq. Akit
appartinneqarpata tunisaqarnerulersitsisariaqarpoq. Akit appartinnissaat
iluaqutaanavianngilaq amerlanerusunik inniminniisoqanngippat. Akunnittarfiit
tamarmik akit appartiinnarnissaat, amerlanerusunik unnuisoqaratik,
pinngitsoortittariaqarparput, isumaqarpoq.
Hotel Arctic sisamanik ullorialik
ataatsimeersuartarfittaqarpoq tallimanik ullorialinnik. Taanna 2023-mi 97-inik
iniuteqarpoq 60-inillu piffissami tamakkiisumi sulisoqarluni. Unnuisut 38
procentii Kalaallit Nunaanneersuupput, 31 procentit Danmarkimit 31 procentillu
nunanit allanit.
Akunnittarfik pitsaassutsimigut,
inissisimaffimmigut kiffartuussinermigullu Kalaallit Nunaanni akunnittarfinni
siuttuusutut inissisimavoq. Akunnittarfik kiffartuussinermigut
pitsaassutsimigullu suliniuteqartuarpoq, nunanilu tamalaani pitsaassutsimut
najoqqutassianik naammassinninnissaq anguniagaralugu, Air Greenland siorna
ukiumut naatsorsuutimini allappoq.
Hotel Ilulissani 20 procentimik siuariarneq
Hotel Arcticip unammillertaa annerpaaq tassaavoq Hotel
Ilulissat, sisamanik ullorialik tallimanillu quleriilik, 2021-mi aasakkut
ammarneqartoq. Taakkunani 2023-mi ineriartorluartoqarpoq.
- Unnuisussanik amigaateqanngilagut. Unnuisut
amerliartuaarput. 2023-mi kaaviiaartitavut inillu unnuiffigineqartut ukiup
siulianut sanilliullugit 20 procentimik amerleriarput, ukiullu siulianut
sanilliullugu siuariarluarpugut, ukiullu siuliani aamma angusarissaarpugut,
Frank Olsvig Bagger oqarpoq.
Hotel Ilulissat ukioq naatsorsuusiorfia maajip
aallaqqaataaniit apriilip 30-ata tungaanoorput. 2023-24-mi kaaviiaartitat
paasissutissiissutigerusunngilai. Naatsorsuutit ukiup ingerlanerani
saqqummiunneqassapput.
Frank Olsvig Bagger Ilu Investimi, Hotel Ilulissanik
piginnittumi, piginneqataallunilu siulersuisuni ilaasortaavoq. Qatanngutini
Tommy Olsvig Bagger taavalu Jens Kristian Friis-Salling piginneqatigai.
Hotel Ilulissani inunnut marlunnut unnuisarfiit ukiup
ingerlanerani 800 koruunit 3.500 koruunillu akornanniissinnaasoq Frank Olsvig
Bagger oqarpoq. Takornariat amerlanerpaaffianni, tassa aasakkut, akisuneruvoq.
- Akit allanngorartuaannarput, neqeroorutigineqartut
piumaneqartullu apeqqutaatillugit. Init piumaneqarnerpaaffianni
akisunerpaasarput, soorlu timmisartumut bilitsit aamma taamaattartut, oqarpoq.
Aningaasat erniaqarpallaarnermik
kinguneqartarput
Hotel Ilulissat akiitsoqarpoq
malunnaatilimmik. Akunnittarfiup 2023/24-mi angusai erniaqarpallaarnermit
malunnaatilimmik sunnerneqarput.
Hotel Ilulissat ukiumi
naatsorsuusiorfiusumi naammassineqaqqammertumi erniat suli ilanngaatiginagit
Hotel Arcticimit sinneqartoornerussasoq Frank Olsvig Baggerip nalilerpaa.
- Ingerlalluarsimavugut, angusalli
ernianit sunnerneqartorujussuussapput, Frank Olsvig Bagger oqarpoq.
Hotel Ilulissat, Hotel Best Westernip
ataaniittoq, 78-inik initaqarpoq.