Nitter: Nalunaaquttap allanngornera kingunerlutsitsingaassaaq

Politikerit nalunaaquttamik allanngortitseqqissappata ukiullu ingerlanerani nalunaaqutaq nalinginnaasoq atuuttussanngorteqqissappassuk, taamaalillunilu Europamut naleqqiullugu nalunaaqutaq malinnaajunnaarpat, tamanna Air Greenlandimut akisussaaq.

Tamatuma saniatigut timmisartuussinerit pilersaarutaasut taamalu innuttaasut angalanissamut periarfissaat ajorseriassapput, tassami ullaakkut Kalaallit Nunaannit ualikkullu Europamit aallartarnerit taamaatiinnarneqartalissapput, timmisartortitseqatigiiffiup pisortaanera Jacob Nitter Sørensen ilisimatitsivoq.

Pisortaaneq apersorneqarnissaminik kissaateqanngilaq, tusarniaanermili akissut innersuussutigiinnarlugu. Tassani ilisimatitsissutigineqarpoq:

- Taamatuttaaq Air Greenlandip inuttaminik Kalaallit Nunaanni inissisimatitsisinnaanera periarfissaajunnaassaaq, naak timmisartoq Europami inissisimaffeqaraluartoq tassanilu teknikkikkut aserfallatsaaliorneqartaraluartoq, pisortaq tusarniaanermut akissummini allappoq, timmisartullu ilaasartaatit narlusuut takisuullu aserfallatsaaliortarfissaat Kalaallit Nunaanni inissisimanissaa piviusorsiornerunngitsoq erseqqissarlugu.

Ullumikkut iluaqutissat

Nalunaaqutaq maanna atuuttoq iluaqutissartaqarluartoq, Jacob Nitter Sørensen oqarpoq:

- Timmisartumi inuttat angalanissaannut pilersaarusiornermut atatillugu sivisuumik qasuersaarnissaq eqqarsaatigineqartariaaruppoq. Timmisartoq inuttallu Kalaallit Nunaanni unnuisinnaalernerinik aqaguanilu aallarsinnaalernerinik tamanna isumaqarpoq, taamaalillunilu inuttat Kalaallit Nunaanni najugaqartinneqarnissaat periarfissaqalerluni, taamaalillunilu piffissaq ungasinnerusoq eqqarsaatigalugu nunaqavissut amerlanerusut sulisorineqarsinnaallutik.

Nuummi mittarfissaq nutaaq naammassineqareerpat ullaakkut Nuummit ualikkut Europamut tikittoqartarnissaa kingornalu unnukkut Kalaallit Nunaannut utertoqartarnissaa Air Greenlandip neqeroorutigisinnaavaa, tassani timmisartoq inuttallu unnuisassallutik.

- Taamaalilluni Kalaallit Nunaannit Europamut tamarmut ullormi ataatsimi angalasoqarsinnaavoq, illuatungaanillu Europamit tamarmit Kalaallit Nunaannut ullormi ataatsimi angalasoqarsinnaalluni. Siornatigut Københavnimi unnuisoqartariaqarpoq. Ullaakkut unnukkullu angalasarnissat Kalaallit Nunaannut allatut ammanerulersitsipput tikikkuminassutsimillu annertunerulersitsilluinnarlutik, tamannalu takornarianut, inuussutissarsiortunut pisortanullu siuariartornermik periarfissanillu nutaanik pilersitsissasoq naatsorsuutigineqarpoq, allassimavoq.

Ilaasunut kingunissat

Timmisartuussinerit allanngortinneqarpata tamanna Air Greenlandimut kisimi sunniuteqarnavianngitsoq, aammali ilaasunut sunniuteqangaassasoq, pisortap erseqqissarpaa.

- Periarfissaq tamanna atorunnaarpat pingaartumik takornariartitsisarnermut, aammali pisortanut inuussutissarsiortunullu, Europamut Europamillu angalanermi ullunik angalanernik, unnuinernik ullormullu akissarsianik sipaarsinnaasunut ajortumik sunniuteqassaaq, Jacob Nitter Sørensen erseqqissaavoq.

USA-mut aqquteqarnissaq pilersaarutini pingaarnerpaasoq, nalunaaqutarlu allanngussappat pilersaarutinut akornutaasinnaasoq, siusinnerusukkut pisortaanerup oqaatigaa.

- Amerika Avannarleq eqqarsaatigalugu New Yorkimut Canadallu kangianut nalunaaquttap akunnerinik pingasunik nikingasoqarpoq. Taamaattumik Kalaallit Nunaat maannakkut nalunaaquttap immikkoortuisa qeqqaniippoq, tamannalu timmisartuussinermut iluaqutaavoq, pisortaq oqarpoq nangillunilu:

Nunap immikkoortuani qitiusoq

- Europamut timmisartuussinerit saniatigut Amerikap Avannaanut toqqaannartumik timmisartuussisoqarsinnaanissaanik naammattumik angallassisoqarsinnaanissaa Air Greenlandip periusissiaanut ilaavoq. Taamaalilluni Kalaallit Nunaat nunap immikkoortuani qitiussaaq, Europap Amerikallu Avannaata akornanni Kalaallit Nunaat aqqusaarlugu timmisartuussisoqarsinnaalluni.

- Ullumikkut nalunaaqutaq malillugu inuttat ikinnerusut atorlugit taamaaliortoqarsinnaavoq, tamannalu Kalaallit Nunaata unammillernermi iluaqutigingaarpaa. Taamaattumik nalunaaquttap allanngortinneqarnerata kingunerisaanik Kalaallit Nunaannit assersuutigalugu New Yorkimut toqqaannartumik aqquteqalernissaq ajornakusoornerussaaq.

Aningaasatigut kingunissat

Aningaasatigut kingunissat pillugit Jacob Nitter Sørensen ima oqarpoq:

- Piffissaq UTC-3-mut allanngortinneqarpat isumaqatigiissutit millioninik marlunnik kisitsisitalinnik naleqartut annaaneqassapput. Isumaqatigiissutit taakku atorunnaarsinneqarsinnaanngimmata, inissallu atorneqarsinnaasut aalajangiiffigineqareermata Air Greenland akiliisussanngussaaq, timmisartuussinermilu akunnernik pissarsisinnaanani, nalunaaqutaq allanngortinneqassappat timmisartuussinissamut pilersaarutip atorneqarsinnaannginnera pissutigalugu. Taamaattumik Air Greenland bilitsinik tunineqartunik tamanik atorunnaarsitsisariaqarlunilu utertitsisariaqalissaaq, tamannalu millioninik marlunnik pingasunilluunniit kisitsisitalinnik naleqassaaq, allanngortitsinerup qaqugu atuutilernissaa apeqqutaalluni.