Niuerneq nunamut iluaqutaasoq

Nunanit allanit aningaasaliisartut Kalaallit Nunaanni takornariartitsinermik ineriartortitsinermut peqataagaangata Kalaallit Nunaannut niuernikkut iluaqutaasarpoq. Topas Explorer Groupimi, Kalaallit Nunaanni takornarianik 1996-imiilli angallassisartoq, pisortaaneq Michael Højgaard taama isumaqarpoq.

- Kalaallit Nunaanni sulilernitsinniilli Kalaallit Nunaanni ingerlatseqatigiiffiutinut 350 millionit koruunit angullugit aningaasaliissuteqarsimavugut. Suliffeqarfimmiit aningaasat annissornagit sinneqartoorutit Kalaallit Nunaanni atorpavut.

- Aningaasatigut ilisimasanillu tunisinissamut periarfissaqaratta nuna nuannarigatsigu taamaaliorpugut. Tamanna immaqa isumaatsuugaluarpoq, aningaasalli Kalaallit Nunaanniiginnarnissaannut tunngatillugu ajunngitsuliorneruinnarnani allatigut atorneqarput.

Sinneqartoorutaassaaq

- Kalaallit Nunaanni ingerlatseqatigiiffiit ullumikkut pingasut ingerlappavut – Hotel Icefjord A/S, Blue Ice Explorer ApS aamma Disko Line A/S. Ingerlatseqatigiiffiit tamarmik assigiissutigaat sinneqartoorniarluta ingerlattaratsigit. Sinneqartoorutit ingerlatseqatigiiffimmiitinniartarpagut, aningaasat taakku namminneq aningaasaataannut ilanngunneqartarmata, Michael Højgaard oqarpoq.

- Tamatumunnga pissutaavoq ingerlatseqatigiiffiit namminneq aningaasaateqartut, allat tamarmik naligiikkaangata, ilaatigut aningaaserivinni aningaasaliiffigiuminarnerusarmata. Nammineq aningaasaateqarneq erniaqarpallaanngitsumik taarsigassarsiniarnermilu atugassarititatigut pitsaanerusumik kinguneqartarmat, taamaalillunilu siunissaq ungasinnerusoq eqqarsaatigalugu ingerlalluarsinnaasumik niuernermik ingerlatsinissamut periarfissaqarfiusarluni. Nammineq aningaasaateqarani ineriartortitsiniarneq ajornakusoortarmat.

- Topas Explorer Group angalatitsiviuvoq. Angalatitsinissamik neqerooruteqartarpugut – eqimattanut ataasiakkaanulluunniit. Sumiiffinnut 50-init amerlanerusunut ullumikkut takornariartitsisarpugut – takornariallu nunanit amerlanernit inniminniisut akunnittarfinnik takornariarfissanik allanillu ilanngussereertarput – nunaqavissunit pisiarisarpaat. Taamaaliorsinnaavugut nunani amerlanerpaani aaqqissuussaalluartumik ingerlariuseqaratta.

Kalaallit Nunaanni pissutsit immikkut ittut

Kalaallit Nunaannili aallarteqqaaramik taamaanngilaq. Tassani namminneq aaqqissuussisariaqarput, tamannalu tunngavigalugu Kalaallit Nunaanni immikkoortortaqarfeqalerniarlutik aalajangerput.

Tassani Disko Line immikkut inissisimavoq, ingerlatseqatigiiffik Kalaallit Nunaanni angallannermut akuersissummik piginnittunut ilaavoq kiffartuussinissamik isumaqatigiissut malillugu ilaasunik angallassisarluni – Air Greenlanditulli.

Disko Line ukiualuit matuma siornatigut Kujataani Qeqertarsuullu Tunuani angallassineq pillugu Naalakkersuisut kiffartuussinissamik isumaqatigiissuteqarfigai. Isumaqatigiissut ukiunik qulinik sivisussuseqarpoq 1. januar 2021-miit 31. december 2030-mut atuuttoq. Kiffartuussinissamik isumaqatigiissut piffissami tamatumani illuatungeriinnit tunuartinneqarsinnaanngilaq.

- Akuersissutinik piginnittuunermi piffissaq sivisooq eqqarsaatigineqartariaqarpoq. Piffissami sivisujaami atortussanut eqqortumik aningaasaliisoqarsinnaasariaqarpoq – taamaalilluni Disko Line Air Greenlandilu assigiinngissuteqaratik, Michael Højgaard oqarpoq, taannalu Air Greenlandimi 2013-imiit 2017-imut pisortaasimavoq.

Ingerlatsivinnik allanik pilersitsinani ineriartorneqx

- Kalaallit Nunaanni aningaasaliinitsinni ineriartorneq ingerlatsivinnik allanik pilersitsinani namminersortunik pioreersunik atuinissaq pingaartippavut. Blue Ice Explorer assersuutissaalluarpoq. Aallarnisaasumit Jacky Simoudimiit aallartinneqarpoq. Piffissap ilaani ingerlatseqatigiiffiup ineriartortinnissaanut aningaasanik pisariaqartitsivoq, taamaattumik affaa pisiaraarput. Simoodilu ukiualuit matuma siorna soraarninngorusummat ingerlatseqatigiiffiup sinnera pisiaraarput, Michael Højgaard nassuiaavoq.

- Nuuk Water Taxi Anders Lykke Laursenimit pilersinneqartoq aamma taama pivoq. Blue Ice Explorer aqqutigalugu ingerlatseqatigiiffiup affaata pisiarineratigut aamma aningaasaliivugut, Anders Lykke Laursenilu ingerlatseqatigiiffiup affaanik suli piginnittoq tassani pisortaavoq – iluatsilluartumik.

- Siusissukkut paasivarput Ilulissani akunnittarfiit piumaneqarlualissasut, taamaattumik Hotel Icefjordimut aningaasaliiniarluta aalajangerpugut. Ingerlatseqatigiiffiup taassuma Qeqertarsuarmi Qasigiannguanilu akunnittarfiit kingorna akisussaaffigilerpai, piffissap ilaani matuneqangajalersimasutut inissikkaluartut.

- Aningaasaliinikkut Qeqertarsuup Tunuani takornariaqarnerup annertusarneranut peqataavugut – tamatumalu saniatigut illoqarfiit mikinerit Kalaallit Nunaanni takornariaqarnerup ineriartortinneqarneranut peqataanissaat qulakkeerlugu.

Kalaallit Nunaanni akileraarut

Kalaallit Nunaanni ingerlatsiviit Topasikkut suliffeqarfinnut akileraarutinik Kalaallit Nunaanni akiliisarput taamaalillutillu nunatta karsianut tapiissuteqarlutik.

- Suliffeqarfiit akileraarutaasa saniatigut sulisut Kalaallit Nunaanni akileraartartussaapput. Taamaattumik Kalaallit Nunaanniinnerput nunatta karsianut millioninik arlalinnik iluanaarfiuvoq, tamatumalu saniatigut suliffissaqartitsinermut annertuumik tapersiilluni, Michael Højgaard erseqqissaavoq.

Kalaallit Nunaanni Topasimi ingerlatseqatigiiffiit pingasut 2023-mi katillugit 92-inik sulisoqarsimapput, taakkualu katillugit 14.782.556 koruuninik akileraarutinik akiliisarsimallutik.

Michael Højgaardip takornariaqarnermut inatsit pillugu naalakkersuisoq Naaja Nathanielsen ataatsimeeqatiginiarlugu sapaatip akunnerani matumani Nuummiippoq.