Niuernikkut suleqatit nutaat
Pisortatut atorfitik qimallugit namminersortunngorput. – Sapiisernissartik pisariaqartippaat, oqarput. Oqaaseqatigiiupput saniatigut suliffeqarfittaavannut oqariartaatsitut ittut.
Unillutik issiasinnaannginagajapput, Arnakkuluk Kleist aamma Maliina Abelsen, marluullutik suliffeqarfiutitaartik Pikiala oqaluttuarigaangamikku.
Aviisi AG taama allappoq.
- Nukittoqqutitta ilagaat Kalaallit Nunaanni pissutsit iluanniit isigalugit sullitavut siunnersorsinnaagatsigit. Siunnersuisartut avataaneersut immikkullu soqutigisallit avataaniit Kalaallit Nunaannik isiginnittut assiginagit. Inuit pillugit oqalunneq ajorpugut, inuilli oqaloqatigalugit, oqarput.
- Kalaallinilli siunnnersuisartoqaaloreerpoq?
- Tamarmik immikkut nalituumik sulisarput. Tamanna ataqqivarput. Isumaqarpugulli suliffeqarfimmik itinerusumik misissuisinnaasunik peqarnissaa inissaqartoq, pingaarnertut siunertaqartumik Kalaallit Nunaannut piujuartitsisumut suleqataanissarput, kulturikku inuiaqatigiinnilu.
Maliina Abelsen aamma Arnakkuluk pilersaarutiminnik isertuussisimapput. Isussukuluutigineqarsimavorli nalaatsornerinnaanavianngitsoq ataatsikkupajaaq atorfimminnit soraarnerat; ilaatigut Katuami pisortatut Unicef Grønlandimilu programchefitut.
Sulinerminnut atatillugu ilisarisimalerput ukiut pingajuata affaata missaani matuma siorna Kalaallit Nunaanni aaqqissuussat maannamut annersaanni Arctic Winter Gamesimi suleqatigiikkamik. Ingerlatseqatigiiffinni angisuuni aqutsinermik atorfeqartarsimapput, Maliina Naalakkersuisunut ilaasortaasimalluni ullumikkut Royal Greenlandimi siulittaasuulluni. Marlulissatulli innertik isumaqatiginngilaat.
- Assigeeqqissaanngilagut. Taamaaqqajanngilaq. Assigiinneqaagut, 2016-imili AWG-mi suleqatigiinnitsinni immitsinnut naleqqussarpugut.
Aviisimi AG-mi atuarnerusinnaavutit. Aviisi uani pissarsiariuk:
